Euro 2024 khelh ṭan a ni dawn ta; Zanin dar 12:30-ah Germany Vs Scotland

UEFA European Championship 2024 chu zanin 12:30 aṭangin khelh ṭan a ni dawn a, Allianz Arena-ah inelna thlengtu Germany leh Scotland te an inhmachhawn dawn.

Germany hi football ram ropui zinga mi ni mah se World Cup hnuhnung pahnihah group stage an paltlang zo lo a, Euro C'ship hnuhnung berah last 16 bak an thleng lo. Julian Nagelsmann kaihhruaina hnuaiah champion ngei an tum ang.

Kroos-a thlahna

Inelna lian hnuhnung pathuma Germany an chet chhiat khan, an innghahna laimu chu Bayern Munich player-te an ni. Tun ṭumah pawh hian Bavarians player-ten hmuh pawimawh chang bawk mah se tun hma angin an langsar ta lo.

Hansi Flick-a'n Germany a enkawl ṭantirh khan Bayern Munich-a a hman thiam sa, Joshua Kimmich leh Leon Goretzka te chu midfield-ah a inkawptir. Kroos hian Flick-a ruahmanna hi a hre lawk a ni ngei ang, Euro 2020 zawhah a chawlh thu a puang.

World Cup 2022-ah Flick-a kaihhruai Germany an mualpho a, Bayern Munich manager hlui tho Julian Nagelsmann chu team enkawltu atan lak a ni. Nagelsmann hian Germany tana inkhelh chawlhsan tawh Kroos chu a kokir a, Real Madrid legend hian kumin February thla khan a rawn let tur thu a nemnghet.

Kroos hian Euro 2024 zawh hian football khelh a chawlhsan dawn a, Real Madrid thlah nan La Liga leh Champions League nomawi a chawi tawh. Germany tana nomawi chawi chunga football khelh chawlhsan hi Kroos-a duhthusam a ni dawn a, mah se kawng awlsam erawh a ni lo ang.

Team thar chu

Nagelsmann-a'n Manuel Neuer chu first keeper atan la hmang mah se captain nihna hlihsakin captain atan Ilkay Gündogan a hmang. Gundogan hi mual laiah Kroos leh Robert Andrich te nen an inkawp ang.

Andrich hi Bayer Leverkusen chet ṭhatna chhan a ni a, Kroos leh Gundogan te anga ball siam thiam a ni ve lo. Khingpuite attack tur lo dang chattu, pet tluk a ṭul pawha pet thlu thei mai tur a ni a, team tan a pawimawh ang.

Goretzka tan squad-ah hmun a awm tawh lo a, Kimmich pawh right back-ah sawn a ni tawh. Heta ṭang ringawt pawh hian Germany hi Nagelsmann hnuaiah an insiksawi nasa hle tih a lang.

Germany hian tlarhnungah Real Madrid rinrawl Antonio Rudiger an kawl a, a kawppui turin Leverkusen defender Jonathan Tah leh Dortmund defender Nico Schlotterbeck te an awm. Tun season-a Leverkusen tana match 48 lai khel thei, Tah hi bul ṭan tur zawka ngaih a ni.

Left back-ah Maximilian Mittelstadt a awm dawn a, Stuttgart tana season ṭha tak hmangtu Mittelstadt hi club lian zawk tan pawh player itawm a ni thei ang. Goalkeeper Neuer hi 2014 World Cup-a an champion theihna chhan a ni a, tunah erawh no. 1 keeper la ni mah se tihsual khut a ching ve ta. Hetichung hian a inhliam a nih ngawt loh chuan Marc-André ter Stegen tan khelhna hun beisei ngam chi a ni lo.

Attacking trio

Tun hnaia Germany chet chhiatna chhan pakhat chu out and out striker an neih loh vang a ni. Goal khung thei striker neih vanga lar ṭhin Germany-in striker ṭha chher chhuah an harsat. Gerd Muller, Karl-Heinz Rummenigge, Rudi Voller, Jurgen Klinsmann leh Miroslav Klose te ram Germany hian striker ṭha chhuan tur an van hle.

Euro 2024-ah hian midfielder aṭanga tlarhmaa awm tura thlak danglam, Kai Havertz chu hmatawngah an hmang ang. Euro 2020 quarterfinal-a England an hneh loh ṭuma a hma bera awm Timo Werner chu squad-ah pawh a awm tawh lo.

Havertz erawh Arsenal tana a chet ṭhat avangin a awmna hmun sawn hma hret a ni a, ram tan innghahna tlak a ni em tih chu hunin a hril ang. Chutihrualin Havertz-a kawppui tur hian Nagelsmann-a'n talent nei ṭha pahnih Jamal Musiala leh Florian Wirtz te a hmang dawn.

Kum 21 mi Musiala hi a kum aṭanga teh chi a ni tawh lo - Euro 2020 leh World Cup 2022-ah te player pawimawh a nih tawh avangin tawnhriat a nei ṭha tawh. Musiala hi Leverkusen game cheimawitu ber Wirtz leh Arsenal forward Havertz te nena an inkawp tur chu an hmuhnawm khawp ang.

Mahse, Germany hian friendly match hnuhnung berah Greece an hneh hram a, chakna goal khungtu chu Brighton tana khel Pascal Gross a ni daih. Ukraine lakah pawh Germany hian goal an khung thei lo a, tun hnai inelna lianah an che chhe bawk nen pressure chu an ngah ve khawp ang le.

Germany team chhung boruak erawh a ṭha. UCL final-a inbakkaih deuh, Antonio Rüdiger leh Niclas Fullkrug te pawh training-naah an nui dun leh tawh. Chutihrualin Germany hian hlim chhunzawm an duh chuan Scotland lakah point thum an hlawhchhuah a ṭul ang.