Germany vel theitu Scotland

Scotland-in manager Steve Clarke kaihhruaina hnuaiah Euro C'ship inelna chu a zawnin an khel a, Tartan Army (Scotland sawina) tan chuan Euro C'ship khelh phak ringawt pawh hi hlawhtlinna a tling.

Germany leh Scotland te hi an sulhnu thlir kir chuan an inthlau tih a chiang a, mah se football-ah chuan engpawh a thleng thei a, Tartan Army hi Germany vel theitu an ni tlat.

Scotland tan qualifying round-ah Scott McTominay a che ṭha a, goal sarih khungin, qualifying-ah team zinga goal khung tam ber a ni. McTominay hi Manchester United tan pawh a khel chhe lo a, season hman zawh takah khan goal 10 a khung.

Tartan Army hian Liverpool left back Andrew Robertson, Aston Villa midfielder John McGinn, Brighton midfielder Billy Gilmour leh Southampton forward Ché Adams te an nei a, Germany tan harsatna siam thei an ni.

Tlarhmaah hliam vangin Ben Doak leh Lyndon Dykes te an inhnuk dawk a, Bristol City striker Tommy Conway hi chhinchhiah a sual lo ang. Kum 21 mi Conway hian Championship-ah goal 10 a khung a, chutihrualin tawnhriat a la neih tlem avangin a inlan a nih pawhin hun tawp lamah a luh a rinawm zawk.