Pavlovic aiah Can a tel

Germany midfielder Aleksandar Pavlovic chu damlohna vangin Euro 2024-ah a inlan thei dawn lo a, kum 20 mi Pavlovic aiah hian kum 30 mi Emre Can koh a ni.

Bayern Munich defensive midfielder Pavlovic hi tonsil na vangin a inhnukdawk a, midfielder hmabak nei êng tak hi a vanduai takzet. Chutihrualin inhliam vanga World Cup 2022 khel thei lo Florian Wirtz pawh, tun ṭumah hian player pawimawh a ni a, Pavlovic tan entawn tur ṭha tak a ni thei ang.

Julian Nagelsmann chuan, "Defensive midfielder thlak nan defensive midfielder bawk kan duh a, Emre Can hian a khelh châk bakah team rawn zawm hi a phur hle. Pressure a san tawh avangin tawnhriat nei ṭha, match khel tam kan duh a; Can lakah hian kan duh ang chu kan hmu," tiin a sawi.

Pavlovic thlakna tur Can hian tawnhriat ṭha tak a nei a, Borussia Dortmund-in Champions League final an thlen theihna kawngah pawh player pawimawh a ni. Liverpool midfielder hlui Can-a tawnhriat hi Germany tan a ṭangkai thei ang.