Super 8 khel tur India
T20 World Cup World Cup khelh mekah Super 8 lut turin India-in harsatna an tawk lo a, Nilaini zan khan USA chu wicket sariha hnehin Super 8 an lut - Men in Blue hian match thum an khelh tawhah hnehna an la chang vek a, inelna thlengtu US tan tun inelnaa vawi khat an tlawmna chiah a ni.
Nassau County International Cricket Stadium, New York-a inkhelah India hi ṭhumvawrah an vannei zawk a, vawm hmasak an thlang - duh an thlang sual lo. US opener Shayan Jahangir chu run pawh siam loin a out nghal a, US batter zingah run 30 tlin an awm lo.
India tan left-arm seamer Arshdeep Singh chu player langsar a ni a, US batter-ten an ngam lo - over li a vawmah run kua chiah a pe a, wicket li a la! US tan Nitish Kumar chuan beiseina a siamsak a, mahse, ball 23 lekah run 27 rawn siam mah se, ani pawh hi Arshdeep-a kutah a 'out' leh ta tho.
US-in over 20-ah run 110 an tlin hram a, wicket riat an hloh. India tan US lakah harsatna a awm lo tura ngaih a ni a, mahse, an bat hun a thlenin Men in Blue hi a tir lamah an talbuai tlat.
Rohit Sharma leh Virat Kohli te India tan an rawn ding chhuak a, US nena khaikhin rual an ni lo. Mahse, khawvel huap pawha cricketer lar bera chhal ngam Kohli hi ball hnihna lekah run siam loin a out a, Rohit Sharma chuan run thum chiah a siam hman tihin a out bawk!
Rishabh Pant a rawn che pangngai viau dawn emaw tih laiin, run 18 lek siamin khelmual a chhuahsan ve leh bawk a, Pant a 'out' hian India hian run 39 chiah an la siam a, over 7.3 ni tawhin, wicket thum an hloh bawk - a ropui lo hle.
Mahse, US player-ten beiseina nei a, an boruak a ṭhat vanglai takin world class team danglamna a lang a, India an tho - Suryakumar Yadav (50 runs) leh Shivam Dube (31) ten a tawp thlenga dam chungin India target an um pha a, over 18.2-ah wicket thum chiah hloh chungin India an chak daih!
India-in a thiam pariat zingah an hming an ziak kai nghal a, chutihrual chuan rilru buaina tur erawh a awm. IPL khelh zawh taka run 741 siam a, run siam hnem ber dinhmun luahtu Kohli a la che ropui hleithei lo.
Kohli hian match thum khelh tawhah run nga chiah a la siam - match hmasa berah run li a siam a, a vawi hnihnaah run hnih siamin, a vawi thumnaah run siam loin a out! Nomawi aia hniama lungawi tum lo India tan Kohli chet ṭhat vat a ṭul ang.