Messi-a cub hnuhnung tur Inter Miami

Lionel Messi chuan a khelh mekna Inter Miami bak club dang neih a tum tawh lo tih a sawi a, hetih lai hian football a chawlhsan hun tur erawh a la sawi mai thei bik lo thung.

Ballon d'Or vawi riat dawng tawhtu Messi hian season hmasa nipui lai khan Paris Saint Germain a chhuahsan a, hahdam leh nuamsa ve deuh zawka inkhelh theih beiseiin Major League Soccer (MLS) club Inter Miami a zawm.

USA aṭanga chuan an ram Argentina a hnai a, ram tana fehchhuah a awlsam phah bakah a naupan laia a khawsak dan phung pangngai ang a neih leh theihna a nih avangin a nuam pawh a ti niin an sawi bawk.

Kum 36 mi Messi hian Inter Miami tan hian kum 2025 thleng daih contract a nei mek a, an inrem dan chuan kum khat dang atana pawhsei leh theih tura tih a ni bawk a, hei chu club leh mimal duhthlanna a ni ang.

Copa America khel tura inbuatsaih mek Messi chuan, "Tun dinhmuna ka ngaihtuah dan chuan club dang ka nei tawh lo ang, amaherawhchu football chawlhsan turin rilru ka la siam lo.

"A nihna taka chuan Europe chhuahsana US lama inkhel tura thutlukna siam kha a harsa ve hle. World champion kan nih hnuah erawh thil ka ngaihtuah dan tam tak a danglam phah thung.

"Football hi ka hmangaih a, inkhelh mai bakah training te hi nuam ka la ti em em vek. Engtik niah emaw chuan hetiang thil hi a tawp hun a la thleng dawn, chu chu ka huphurh hle a ni," a ti.

Argentina captain hian an ram leh club tan nomawi chawi theih awm zawng zawng a chawi kim tawh a, hmabak hlen chhuah tur a nei tawh hran lo, chutihrualin football khelh erawh a la kham thei bik lo.

Messi chuan, "Hun ka nei tam tawh lo tih ka hria, chuvangin match ka khelh ang chhun chhunte hi ka ngaihlu em em a, tuna nuamti taka ka inkhelh theih laite hi nakinah chuan ui leh ngai tak chungin ka la thlir kir dawn a ni," a ti.

World champion Argentina hian Copa America inbuatsaihna hnuhnung atan Inrinni zing dar 5:30 hian Guatemala an hmachhawn dawn. Inelna takah chuan Canada, Chile leh Peru te nen group stage-ah an inel ang.