Referee thutlukna kan tuar - Lianzuala
India-in Qatar khelmualah 1-0 in hma an hruai reng a, goal khungtu pawh Mizo tlangval Lallianzuala Chhangte a ni. Mahse, Qatar hian Youssef Ayman Farahat-a goal sawisel hlawh hmangin si phurh an sut a, Ahmed Alrawi chuan chakna goal a khung zui.
Thawhlehni zan inkhelah Blue Tigers hian hnehna chang se, World Cup qualifier third round lut tur an ni a, mahse, an tlawm tlat. India tana goal hmahruai khungtu LZa chuan, "Ka ui khawp mai. Han chak hram ila chu tling mai tur kan ni asin mawle.
"A nihna takah erawh referee thutlukna dik lo kan tuar a, chuvanga chak loah chuan ka inngai a ni," tiin Vanglaini a hrilh a, Lunglei tlangval ngaihdan hi a ṭawmpuitu kan tam zawk ang.
India hian November 2023 khan Qatar hi India-ah lo mikhual tawh bawkin, 3-0 in an ngam lo. Lianzuala chuan, "Kan vawi hnih intawnna a ni a, a rilru nat thlak duh khawp mai," a ti a, Asian champion laka vawi hnih ngawt an tlawm chu a lak nat thu Vanglaini a hrilh.
Mahse, AIFF Player of the Year ni lai chuan Qatar phak lohna an la neih thu a sawi a, Lianzuala chuan, "Thutlukna siam kawngah kan la inthlau deuh a, tharum leh fitness-ah chuan kan inthlauhna a tam tawh lo," a ti.
World Cup 2026-ah India hmel kan hmu dawn lo chiang a, chutihrual chuan tun international break hi Mizoram football tan chuan hun duhawm a ni - India squad-ah Mizo pali an awm a, Lianzuala bakah East Bengal defender Lalchungnunga, Inter Kashi forward Edmund Lalrindika leh Mohammedan SC striker David Lalhlansanga te chu squad-ah an tel.
Hei mai a ni lo. Probable squad-ah Mumbai City midfielder Lalengmawia Ralte (Apuia), Odisha FC forward Isak Vanlalruatfela leh Aizawl FC striker Lalrinzuala te an tel bawk. Apuia hian MA exam a neih avangin squad a zawm lo a, Isak leh Rinzuala an inhliam bawk - ni lo se chuan, India squad-ah hian Mizo player tam zawk an tel thei hial ang.
Hetihlai hian Qatar goal khung pawm chungchangah All India Football Federation (AIFF) thuneitute lung a awi thei lo a, FIFA hnenah an lawm lohna an thlen. Qatar goal hmasa zawk hi corner turin pawn lamah ball a lir chhuak tawh. Mahse, Alhashmi Mohialdin chuan pawna ball awm hi thai letin, Aymen chuan goal-ah a lo chantir a ni.
AIFF president Kalyan Chaubey chuan FIFA thuneitute hnenah lehkha a thawn thu sawiin, "AIFF chuan football mawina chawisang chung zel a, thuawih taka a inkaihhruainate zawm zel hi kan duh dan ber a ni.
"Hei hi kan dinna pawh a la ni reng a, chutihrual chuan Qatar nena kan inkhelh zawhah khan kan Chief Refereeing Officer thurawn angin, FIFA Head of Qualifiers, AFC Head of Referees, AFC Head of Competitions leh kha inkhela Match Commissioner te hnenah khan lehkha kan thawn a, World Cup qualifier third round kan luhna kawng daltu, kha tihsual lian tak kha zirchiang turin kan ngen a ni.
"Hei chauh a ni lo - he thil thleng hi thaibo theih ni tawh lo mah se, a engti kawng emaw taka kawng dang dap dan min ngaihtuahsak turin kan ngen a, he game zahawmna hi thil pawimawh ber a ni tih hre chunga FIFA leh AFC pawhin hma an lak ngei kan beisei," a ti a, FIFA lam hian engtin nge an chhanlet dawn hriat a châkawm hle.