Vawi thum chak zawn Boston Celtics

Boston Celtics chuan a vawi 18 nan NBA momawi an chawi ngei dawn niin a lang ta - nimin zing khan Dallas Mavericks chu 106-99 in an hneh. NBA Finals khelh laia match hmasa pathumah an chak vek tihna a ni a, champion turin an dinhmun a ṭha ta hle.

NBA Finals hi best of seven series hmanga khelh a ni - Boston hi vawi khat an chak leh a nih chuan inelna a zo der dawn. June 15, Inrinni zing dar 6:00 hian game 4 an khel leh ang - Dallas Mavericks tan chak loh a thiang tawh lo tihna a ni.

Nimin zing American Airlines Center-a inkhelah Boston Celtics tan Jayson Tatum chuan point 31 a nei a, point 30 neitu Jaylen Brown nen an che ṭha lehpek hle. Team pahnih te a tir lamah an inum tawk hle, chawlhlawk laia an inthlauhna chu point khat chauh a ni hial.

Basketball hre ril miten quarter pawimawh bik tia an sawi ṭhin, quarter thumnaah Celtics an che ṭha leh tlat - point 35 an neih belh laiin mual neitu lamin point 19 chauh an nei. Quarter hnuhnung berah Dallas rawn kang ve leh mah se an tho chhuak phak tawh lo.

Tatum chuan, "Kan thawhrimna vangin tun hun hi kan thleng. Tunah hian hahchawl hman kan la ni lo, hetiang hun thleng tur hian hun rei tak chhung kan bei tawh a, chuvangin a hmawr kan bawk hma chuan tha kan thlah lo ang," a ti a, a zawna game li lak theih an tum hle.

Dallas Mavericks thiampuipa Luka Doncic chu hun tawp hma minute li leh second 12 la awmah a 'fouled out'; vawi ruk ngawt a foul tlin avangin a khel chhunzawm ve thei lo. Kyrie Irving-a'n point 35 nei mah se chak nan a tawk zo lo a, thlawptu a nei ṭha tawk lo bawk.