New Zealand hnehin Windies-in Super 8 an lut

T20 World Cup-ah inelna thlengtu West Indies chuan New Zealand 13 runs-in an hneh a, Windies hian match thum khelhah hnehna chang vekin Super 8 an lut.

Black Caps erawh match hnihah vawi hnih an chak lo a, an hneh loh hi Windies bakah Afghanistan a nih avangin tla thei dinhmunah an ding.

San Fernando-a inkhelah hian ṭhumvawrah Black Caps an vannei a, vawm hmasak an thlang. Windies-in bul an ṭan ṭha lo a, top order panga Brandon King (9), Johnson Charles (0), Nicholas Pooran (17), Roston Chase leh captain Rovman Powell (1) te zingah run siam tam an awm lo.

Windies hi chak lo theia an ding hnuah Sherfane Rutherford a rawn inlar a, ball 39-ah 68 runs siamin a tawp thlengin a dam a, 149/9 runs an siam bawk.

New Zealand bat hun a thleng a, mawhphurhna la thei an awm lo. Captain Kane Williamson pawhin run khat lek a siam a, Glenn Phillips-a'n 40 runs siam mah se over 20-ah 136/9 runs siamin 13 runs-in Windies run siam an pha lo.

Tukin zing hian Afghanistan-in Papua New Guinea an hmachhawn dawn a, Rashid Khan-a hote hian hnehna an chang a nih chuan New Zealand hi chhiarkawp dan thlapin an tla ang.