Bagan coach thar Molina

Mohun Bagan chuan coach atan Spain international goalkeeper hlui José Francisco Molina an la lut a, mahse, kum 2016-a ISL club ATK coach lo ni tawh hian engtianga rei nge contract a ziah tarlan a ni lo.

Player a nih laia Atlético Madrid leh Deportivo La Coruna tana hming chher tak Molina hian kum 2016 khan ATK enkawlin, Indian Super League-ah nomawi a chawipui a, hna a thawk chhe lo. Mahse, hemi hnu hian Mexican second division club Atlético San Luis enkawlin, match 11-ah vawi hnih chiah a chakpui avangin an ban.

Mexican club-in an ban hnu hian coaching lamah a inhmang zui lo. July 2018 khan Spain national team chu Sporting Director ni turin a zawm a, Fernando Hierro a thlak. Mahse, World Cup 2022-ah round of 16 an paltlang zawh loh avangin a bang a, India lam hawiin a puanthuah a tel leh ta.

Villarreal leh Getafe reserve team pawh lo enkawl tawh Molina hian manager anga a hlawhtlinna langsar ber chu Hong Kong lamah daih a tawng. 2014-15 season khan Hong Kong club Kitchee chu league, FA Cup leh League Cup-ah te a champion pui vek a ni.

Kum 53 mi Molina chuan, "Club sulhnu ropui tak nei Mohun Bagan Super Giant chhungkuaa ka tel tur hi ka lawm a, he club leh fan te tan hlawhtlinna leh lawmna tam tak ka thlen theih ka beisei," a ti.

Molina hian season hman zawh tak ISL final-a Mohun Bagan hruai thlengtu Antonio López Habas a thlak dawn a, kum 2016-a ATK a zawm pawh khan Habas tho hi a thlak.