Juve manager thar Motta

Juventus chuan manager thar an zawn chu a chhanna an hmu ta - Old Lady manager thar atan Thiago Motta ruat a ni a, Bologna manager hlui hian Massimiliano Allegri hmun ruak a luah ang.

Turin club hian season hmasa an hmang ṭha lo a, Serie A an champion lo a ni satliah lo - Inter Milan chu an chhaih buai phak lo. Italian Cup la tho mah se Allegri hi an ban zui ta tho a ni.

Kum 41 mi Motta hian kum thum daih contract a ziak, player a nih laia Inter Milan tana khel ṭhin hian kum 2027 June thla thleng Juventus hi a enkawl dawn tihna a ni a, a contract hi pawhsei theih tura tih a ni bawk.

Season hmasa Serie A lama Bologna pangana nihpuitu Motta chuan, "Club ropui leh lian tak Juventus tana hna ka thawk ve thei tur hi ka lawm. Juve hi an ropuina ang taka enkawl ka tum ang.

"Club thuenitu, player leh min ṭantute zawng zawngte hlimna thlen ka tum dawn a ni," a ti a, season hmasa khan team langsar tak ni lem lo a kaihhruai ṭhat em avangin Juve hian an chungah rinna an nghat a ni.

Player a nih lai chuan Inter Milan bakah Barcelona, Atletico Madrid, Genoa leh Paris St-Germain tan a khel a, team enkawl lamah chuan Bologna a enkawl hmain Spezia a lo kaihruai tawh bawk.