Wolves player thar Gomes

Premier League club Wolverhampton Wanderers chuan Braga aṭangin Rodrigo Gomes an la lut a, a man atan pound maktaduai 12.7 an inseng - kum 2029 thleng an hnena khel turin contract an ziahpui a, kum khat dang pawhsei theih a ni.

Wolves manager Gary O'Neil chuan, "Hma taka player kan la lut thei hi ka lawm hle. Transfer bazar-ah hian mak tak maia khawtlai awl tak mai a ni a, mahse, squad din duh tan chuan tihfel vat vat a ṭul bawk si," a ti a, player an la lut hma chu a lawm thu a sawi.

O'Neil chuan sawi zawmin, "Rodrigo hian season duhawm tak a hmang a, kum 20 mi lek ni chungin position hrang hrangah a khel thei bawk. Kan tan chuan signing duhawm tak a ni a, player naupang, theihna nei sang tak a ni," a ti.

Portugal Under-21 international Gomes hian season hmasa kha Primeira Liga club tho Estoril-ah loan-in hun a hmang a, inelna hrang hrangah match 36 khela goal kua khungin, assist vawi riat a nei.

Wolves hian nipui transfer-a player pahnih an lakluhna chiah a ni a, Gomes hma hian season hmasa lama loan-a an hawh, Manchester City midfielder Tommy Doyle chu a nghetin an la lut tawh bawk.

Kum 22 mi Doyle manah hian £4.3mtd an seng. Mahse, an hralh a nih chuan City-in 50% share an nei ve dawn a, hei bakah hian lei let theihna dan an nei tel bawk. Season hman zawh takah khan match 32 khelin goal khat a khung - Wolves-ah hian kum li chhung atan contract a ziak a ni.