Spain tan Nadal leh Alcaraz

Paris Olympic neih hun a hnai a, infiamna khawmpui lian hi July thla maia khelh a ni dawn - Spain tan tennis khel thiam pahnih Rafael Nadal leh Carlos Alcarz te chu doubles huangah an ṭangdun dawn.

Olympic tennis hi Roland Garros-ah khelh a ni dawn, he hi French Open an khelhna hmun kha niin, hmanni lawk khan Alcaraz hian a vawi khat nan nomawi a lo chawi.

Kum 38 mi Nadal tan Paris khawpui hi hmun thar a ni lo, tun hmain nomawi vawi 14 tehmeuh a lo chawi tawhna hmun a ni a, sulhnu nei ṭha fal ber a ni bawk.

Spain national team coach David Ferrer chuan, "Rafael Nadal leh Carlos Alcarez te chu Paris-ah an inlan dawn a, an ṭangdun ang, hei mi ram mipuite duh leh beisei ang pawh a nih ka beisei," a ti.

Grand Slam vawi 22 champion tawh Nadal hian Beijing 2008-ah khan an ram tan gold medal a lo vaw chhuak tawh a, a ṭanpui tur Alcaraz erawh Olympic-ah chuan a inlan vawi khatna tur a ni thung.

Nadal tan hun hnuhnung a ni chho zel tawh a, Olympic a khelh theih loh mai rinna pawh a lian hman hle. Mahse, April thla aṭang khan a inkhel ve leh ṭan tawh a, a ṭhat dan tak la ni lo mah se match pangngai a khel thei tawh.

A kum tam zawk Nadal hi a vanglai a pel deuh tawh a, hetih lai hian Alcaraz erawh vanglai hmang mek a ni thung - French Open hma hian Wimbledon leh US Open nomawi a lo chawi tawh bawk a ni.

Great Britain tana inlan tur la chiang chiah lo mah se, tun hnai khan Dan Evans chuan Andy Murray nen doubles khelh dun theih a beisei thu a lo sawi zauh tawh a, an ṭangdun a nih pawhin a mak hran lo ang.

Olympic hma hian Wimbledon khelh tur an nei dawn, grass court inelna lian an hmachhawn tur hian Olympic boruak ṭhenkhat erawh a la tidanglam ve thei bawk dawn a ni.