Spurs leh Ndombele an inṭhen

French midfielder Tanguy Ndombele chuan Tottenham Hotspur-ah kum khat dang khel turin contract la nei mah se, inhriatthiam tawnnain a contract hi an titawp.

Ndombele hian July 2019 khan Spurs hi Lyon aṭangin a zawm a, hetihlaia a man zat hi pound maktaduai 53.8 niin, a hun laia Spurs player man to ber a ni hial.

London club tan hian a match hmasa berah goal a khung nghal a, mahse, beisei ang erawhin a khel zui lo. Spurs tan inelna hrang hrangah match 91 khela goal 10 khungin, assist vawi kua a nei.

Kum 2022 khan Lyon chu loan-in a zawm a, hemi hnu hian Napoli leh Galatasaray-ah te season khat ve ve loan-in a khel bawk a, Serie A leh Turkish Super Lig-ah nomawi a chawi ve ve!

Ndombele hian January 2022 khan FA Cup third round-ah Spurs jersey hain Morecambe a hmachhawn a, hemi hnu hian Tottenham thawmhnaw hain a inlan leh tawh lo.