Kan tan chuan a sang lua a ni - Sinner

Mipa tennis thuneitu sang Association of Tennis Professionals (ATP) in world ranking an tihchhuah thar berah Jannik Sinner chu number 1 a ni a, Italian mipa zingah hetiang dinhmun luah thei hmasa ber hi a ni hial.

Kum 22 mi Sinner hian January thla khan Australian Open nomawi a chawi a, Grand Slam title a lak hmasa leh awm chhun a la ni rih. Tun hnaia khelh zawh tak French Open-ah khan semifinal thlengin Carlos Alcaraz a ngam lo thung.

Season hmasa aṭangin a khel ṭha tluang tawh a, point a neih sa te belh khawm zel niin tunah chuan Novak Djokovic a nek chhuak thei ta. Serbian star Djokovic hi pathumnaah a tlahniam thung a ni.

Italian tlangval Sinner chuan, "Ka chawr chhuahna ka en a, ka nu leh pa bakah kan chhungkaw dinhmun ṭhin ka ngaihtuah a, ka tan chuan world number 1 nih ve mai chu a sang takzet a, a mak pawh ka ti zawk.

"Tennis kheltute hian world number 1 nih chu kan duh vek a, kan duhthusam leh suangtuah ṭhin pawh a ni. Ka tan chuan duhthusam thleng dik ni mah se awih pawh a harsa," a ti.

Sinner hian lawmpuitu a nei tam hle a, chung zingah chuan Roger Federer, Andre Agassi leh Andy Roddick te pawh an tel - player ropui pathum hi an hunlai chuan number 1 ni thei an ni a, an dinhmun ang chelh theitu an lawmpui a ni.