Football-in run a lawi dawn em?

Pathianni zanlai dar 12:30 a lo ri ang a, football neitu ang maia inchhal England ram chuan Euro 2024 bul an ṭan ang a, an match hmasa ber atan Serbia an hmachhawn ang.

Gareth Southgate-a kaihhruai Three Lions hian eng ang takin nge champion an duh tih chu sawi thiam harsa tak a ni a, football an âtchilhzia erawh thu mai ni loin a taka hmuh tur a awm thung.

Mizote ten Premier League kan en tam a, kan tuipui bawk - England tana khel turte hi Mizo tlangval football ngainate chuan an hminga an koh theih vek an nih a rinawm a, chuvangin Mizoram aṭang pawhin an inkhel hian ngaihven a hlawh hle dawn a ni.

Lo haw thuai thuai...

English mipuite khuan football hi an ta niah an ngai hmiah a, 'A runah football a lawi dawn e...' tih chu an au hla a ni ṭhin. Euro 2020 khan an duhthusam a thleng dik teuh hle a, mahse nomawi inchuhna inkhelah an vanduai.

Mizoram buai kum 1966 khan England hian World Cup title an la a, a bak chu nomawi hlu an la hlawh chhuak leh lo - Sir Alf Ramsey sulhnu ropui, hlui tawh tak mah se an sawi nin theih loh hi Southgate-a'n zui a tum ang.

English media ṭhenkhat chuan, tun ṭumah hian Southgate hi a hlawhtling lo a nih chuan England team enkawl hna a thawh zui an rin loh thu thlengin an ziak a, amah Southgate ngei pawhih a pha lo - a hlawhtling a nih erawh chuan World Cup rin a nam zui dawn a ni.

Khelh dan tur

Gareth Southgate-a'n formation hman thiam pahnih a nei; 4-2-3-1 leh 4-3-3 a hmang ṭhin, group stage bik thlir chuan engtin nge tlarhnung an inrem ngheh thei ang tih chu a ngaihtuah tur pawimawh niin a lang.

Defender tawnhriat nei ṭha Harry Maguire a hliam a, rinrawl tur John Stones pawh tun hnaia dam ṭha leh chauh a ni. England hian high line defending an khelhin an tlarhnung a pawp nasa ṭhin, hei hi an ngaihtuah a ngai.

Nikum November thla aṭang khan result an nei ṭha tawk lo - Brazil an hneh lo a, North Macedonia leh Belgium nen an inhnehtawk, heng inkhelah te hian goal an chhuah vek.

Euro inbuatsaihnaah Bosnia an hmachhawn erawhin 3-0 in an chak, he inkhelah hian defender pali hmangin 4-2-3-1 angin a naute a rem a, hetiang bawk hi a hmang leh a nih pawhin a mak lo ang. Iceland lakah erawh an mualpho tih theihnghilh lo ila.

Kane leh Bellingham

England hlawhtlin hleihtheih loh chhan hi chi hrang hrang an sawi ṭhin a, a dik ber erawh hriat theih a ni lo. EPL boruak a lian a, ram dangah an player an khel chhuak ngai meuh lo, hei hian nghawng a nei nia ngai pawh an awm ṭhin.

Tun hnaiah erawh Jude Bellingham a chhuak a, ani hi Borussia Dortmund tan ṭha taka a khelh hnuah Real Madrid rinrawl a ni - Spanish club lian tana a season khatnaah La Liga leh Champions League nomawi a chawipui.

Euro khelhna tur Germany ramah Bellingham hian a ṭhat tawkzia a pholang tawh a, tun ṭumah pawh hian Three Lions inkhel boruak siam danglam thei tura ngaih a ni a, mipui mit fukna bik pawh a ni ang.

England captain, an striker ṭha leh innghahna ni bawk Harry Kane chuan Tottenham aṭangin Bayern Munich a zawm bawk. Bavarians tana match 45 aṭanga goal 44 khungtu hi German ramah a mikhual thar thut dawn lo.

Serbia an ṭha

England defender-te tan ngaihṭha taka awm theih a ni ngawt dawn lo - an khingpui tur Serbia hian striker ṭha Dusan Vlahovic leh Aleksandar Mitrovic te an nei, midfielder ṭha Sergej Milinkovic-Savic an nei bawk.

Mitrovic hian Premier League lamah sulhnu a nei ṭha, tharum a ngahin ball kang leh leiah a hlauhawm - Juventus striker Vlahovic pawh boruaka hlauhawm chi a ni bawk - England hian Maguire an ngai viau mai thei!

Mitrovic hi 6ft 2in a sang niin, a kawppui Vlahovic hi 6ft 3in a ni thung - Southgate-a'n a naute hnenah ball kang ven dan a hrilh uluk hle a ngai dawn a, tawnhriat nei Stones a pawimawh zual dawn hle a ni.

Tournament ṭan a nih hma aṭangin Serbia hian buaina an nei nghal a, an training laiin fans leh German police-te an intibuai nghal phawt a, inelna tak an hmachhawn hunah pawh boruak dai leh reh tak aiin boruak nung leh thawm na tak kan hmuh a rinawm.