Italy thar zaninah kan hmu dawn

Euro 2024-ah zanin dar 12:30 hian Italy an inlan dawn a, Albania an hmachhawn dawn. Azzurri hi European champion lai ni mah se Roberto Mancini hoa champion team leh tun ṭuma inlan tur hi chu team dang hlak an ni tawh - Luciano Spalletti hnuaiah engtiangin nge an rawn khelh dawn, hriat a châkawm tawh hle.

World Cup 2018 an inpetkai loh hnuah Italy hian Roberto Mancini hoin kum 2020 khan ropui takin Euro nomawi an chawi a, beiseina sang tak an neih laiin World Cup 2022 an inpetkai zo lo zui!

August 2023-ah Roberto Mancini-a'n Italy coach hna a bansan zui a, a hmun ruakah Spalletti a lut. Italian coach hi Serie A-a ropui taka Napoli champion puitu kha a ni a, a lakah beiseina pawh a sang hle.

Spalletti-a'n thlak danglam tum a nei a, player kum upa tawh leh tawnhriat nei tam tak thlauh thlain, team thar din a tum. Kum 65 mi coach hian, "Football-ah chuan thil thar kan mamawh reng a, an thisen zungzam zawng zawng nena bei a, an theihna pholan duh mite hi ka duh ṭhin.

"Chutiang ang chona hmachhawn chu i zuam lo a nih chuan i tawpna chu tlawmna a ni mai," a ti a, team thar din a tumna kawngah a khauh hle - Euro 2020 champion ṭuma mi kha player pasarih bak an awm tawh lo a, thisen lum leh kum naupang zawkten an hmun an luah.

Italy tlarhnung hi tun hma angin an langsar tawh lo a, chutihrual chuan goalkeeper leh captain ni bawk Gianluigi Donnarumma-a'n si ban a la nghah theih avangin lungngaih viauna tur erawh a ni lo.

Spalletti-a'n 4-3-3 emaw 3-4-2-1 emaw hmangin a team a rem ṭhin a, zanin a rem dan tur hriatthiam a har. 4-3-3 a hman chuan a laiah Alessandro Buongiorno leh Alessandro Bastoni te an inkawp ang a, full back-ah Giovanni Di Lorenzo leh Andrea Cambiaso ten mawhphurhna an la ang.

Midfield-ah Jorginho, Bryan Cristante leh Lorenzo Pellegrinian awm thei ang a, tlarhma laiah Gianluca Scamacca awmin, Davide Frattesi leh Federico Chiesa ten an thlawp thei dawn.

Italy hi group of death tia chhal, group B-ah Croatia leh Spain te nen an awm ho a, team nem bera chhal theih Albania lakah an chak zo lo nghal a nih chuan an tan round of 16 lut turin a harsa sawt ang tih a chiang - chak ngei ngei a ṭul.

Chutihrual chuan Albania hi vanneih vang ngawta Euro 2024 khel tura inpetkai an ni bik lo tih hriat tel a ṭha - qualifier-ah Czech Republic, Poland, Moldova leh Faroe Islands te nen awm hoin, match riat an khelhah vawi khat chiah an tlawm a, group hmahruaitu ni chungin Germany zin theihna ticket an hlawh chhuak.

Coach Sylvinho hian January 2023 aṭang khan Albania hi enkawl ṭanin, match 14-ah vawi riat a chakpui thei a, vawi thum draw neiin, vawi thum chiah an tlawm. Barcelona left back hlui Sylvinho kaihhruaina hnuaiah beiseina an nei sang a, player pawh an nei ṭha.

Goalkeeper hi Italy hrechiangtu, Empoli keeper Etrit Berisha a ni a, Lazio defender Elseid Hysaj, Atalanta centre back Berat Gjimshiti, Inter Milan midfielder Kristjan Asllani leh Fulham striker Armando Broja te ho an nei a, Italy laka thilmak thlentir turin an ṭha tawk.