Champion lai Police hmaah Ramhlun Athletic

Mizoram Premier League Board-in MPL11 fixtures a tichhuak a, match hmasa berah champion lai Mizoram Police leh club thar tia chhal theih Ramhlun Athletic te an inkhel dawn. MPL Board hian round 7 thleng fixtures a tichhuak a, round 5-na leh round 6-na inkarah I Day Football Tournament khelh a ni ang.

MPL10 khelh zawh tak kha, inelna tir lam boruak a nung lo nachungin final bik erawh MPL awm tawh zawng zawnga en man hla ber tia sawitu an awm pawhin an demawm loh. A chhan chu Police leh Chanmari FC ten ennawm hmuhnawm an lantir tlat.

Kumin erawh MPL a nung thar leh dawn niin a ngaih theih. MPL11-ah round 7 thleng chuan zan inkhel la awm lo mah se RG Stadium-ah vek khelh a ni dawn. MPL10-ah erawh RG Stadium chan loh avangin 1st Bn MAP ground-ah match ṭhahnem tak khelh a ni.

Kuminah hian kum dang ang lo takin team thar pali an awm dawn a, season khata team inthlak tam ber ṭum a ni. Ramhlun Athletic-in Chhinga Veng FC ai an awh dawn a, Sihphir Venghlun FC-in Electric Veng ai an awh thung ang.

Ramhlun Athletic leh Sihphir Venghlun bakah hian MPL Qualifier-a pakhatna FC Bethehem leh MPL playoff-a Project Veng hnehtu SYS FC te an khel dawn bawk. Team thar pali hian MPL-ah phurna thar a pek theih a rinawm a, tualchhung football pawh a nung sawt tura ngaih a ni.

Tun dinhmuna thawm la nei lian ber erawh Chanmari FC an ni a, anni hian coach Lalsangzuala Hmar an la a, tualchhung player ṭha an rut khawm nasa hle. I League club Aizawl FC hi season tina champion rinkai ni pha ziah an ni a; inelna hnuhnung pahnih champion Chawnpui FC leh Mizoram Police te hi dah hniam theih an ni lo bawk.