Spain vs Croatia: Zaninah inkhel hmuhnawm bik

Infiamna khawvelin a nghahhlelh leh a thlir châk European Championships 2024 chu nizan khan khelh ṭan a ni a, zanin aṭangin match hmuhnawm en tur a awm nghal dawn. Zanin dar 9:30-ah Spain leh Croatia te an inhmachhawn ang.

Europe mai ni lo, khawvel huap ang pawha team ṭha pahnih hi group B-ah an awm dun a, Italy leh Albania an la awm tel bawk avangin 'group of death' tia koh loh rual a ni lo. Group stage-ah chuan ngaihven an hlawh ber ang.

Spain, Italy leh Croatia te ngat phei chu champion sawi ri ngam ṭhiau an ni a, an tan nomawi chawi loh hi hlawhchhamna a ni dawn a, group stage aṭanga tlak ngat phei chu mualphona tawpkhawkah chhiar a ni dawn.

A tawi zawnga sawi chuan vawi khat chetsual a pawi thei dawn a, match hmasa bera chak nghal hi team pahnih tan a pawimawh. Zaninah thih thain an bei dun nghal dawn tih a chiang a, inkhel hmuhnawm en tura inbuatsaih mai a finthlak ang!

Final rematch

UEFA Nations League 2022-23 season-ah Spain an champion a, final-a an hneh chu Croatia an ni - team pahnih hi 0-0 in an inhnehtawk a, penalty-ah 5-4 in Spain hi a vannei zawkah an ṭang a, nomawi an chawi.

June 2023-a team pahnih intawn ṭum aṭanga tehin player pawh an la danglam tam lo a, coach pawh a ngai ve ve an la ni. Croatia hi coach Zlatko Dalić chuan a la enkawl reng a, kum 2017 aṭanga kaihruai tawhtu a nih avangin a hrechiang.

Dalic hoin Croatia hian sulhnu an nei hraw hle a, World Cup 2018 final an luh bakah, kum 2022 pawh khan semifinal an thleng leh bawk. Dalic hoa Croatia thlen chin a ropui viau rualin, 'an teuh ral' tiin a sawi ve theih tho!

Hei vang hian Croatia a enkawl hmaa middle east lama coach hlawhtling hian pakhatna lawmman dawn a duh tawh ngei dawn a, UEFA Nations League final-a an ngam loh hnu team hi an theihna enchhinna ṭha tak a ni ang.

A hming La Fuente

Football khawvela ram langsar an nih miau avangin Spain-in coach pawh an nei hraw ṭhin a, tun Euro-a kaihruaitu tur La Fuente erawh senior football-ah sulhnu ropui chhuan tur nei lo a ni.

Chutihrual chuan Spain team hrechiangtu a nihna hi La Roja tan pawh thil ṭha a ni a, Spain hi nomawi a chawipui a nih pawhin thil mak a ni lo ang. Chutiang tur erawh chuan team ṭha hneha bul ṭan a ṭul a, Croatia an hneh chuan an inringtawk sawt ang.

La Feunte hian December 2022 khan Spain a enkawl ṭan ve chauh a, coach lar Luis Enrique a thlak. Mi tam takin iai mah se, UEFA Nations League-ah Spain a champion pui a, a khelh dan avangin fak a hlawh zui ta bawk.

Kum 62 mi La Feunte hian Euro Under-19 (2015) leh Under-21 (2019) ah te Spain a champion pui tawh a, kum 2020 khan Spain U23 chu Olympic-ah silver medal a hlawhchhuahpui bawk - Euro leh Olympic-a a player hrual ṭhenkhat senior team-ah a kaihruai zui a, Spain a hrechiang hi an ṭhatna pakhat a ni.

Euro inbuatsaihna

La Feunte kaihhruaina hnuaiah Spain-in match 14 chiah an la khel a, vawi 10 an chak - vawi hnih draw an nei a, vawi hnih an tlawm. Spain hian qualifier match riat an khelhah tlawm nei loin Euro an inpetkai a, an inringtawk khawp ang.

Chutihrual chuan Scotland, Norway, Georgia leh Cyprus te chu qualifier group lama an awmpui a nih avangin inchhuan viauna tur awmin a lang lo. Kum 2024-ah match li khelin, vawi hnih an chak a, Colombia (1-0) lakah tlawmin Brazil (3-3) an inhnehtawkpui.

An hneh pahnih hi Andorra (5-0) leh Northern Ireland (5-1) niin an ropui lutuk lo a, La Feunte hoa major tournament an hmachhawn hmasak berah enge an an dawn, hriat a châkawm tawh hle.

Croatia hian qualifier match riatah vawi nga hnehna changin, vawi hnih tlawm an nei a, vawi khat an draw. An hneh loh hi Turkey leh Wales an ni a, mahse, kum 2024-a friendly match pali an khelhah chak vekin, Euro hmaa an match hnuhnung berah 2-1 a Portugal an hneh avangin an inringtawk khawp ang.

Engtin nge Spain?

Spain-in 4-3-3 a team an rem a rinawm a, La Feunte hnuaia ball keng hnem ṭhin Spain-in mual sir aṭanga ball vawrh an chin avangin captain pasang Alvaro Morata chu tlarhmaah a ding ang - mual sir aṭangin Barcelona rawlthar Lamine Yamal leh Athletic Bilbao thiampuipa Nico Williams ten an thlawp ang.

Euro-a inlan thei naupang ber record chelhtu chu Poland player Kacper Kozlowski a ni a, kum 17 leh ni 246 mi niin record a siam. Yamal hi a inlan a nih chuan kum 16 leh ni 338 mi niin record a siam dawn.

Midfield laiah Rodri awmin, RB Leipzig chhuanvawr Dani Olmo leh Paris Saint-Germain midfielder Fabiabn Ruiz ten an thlawp a rinawm a, tlarhnung laiah Real Sociedad centre back Robin Le Normand leh Aymeric Laporte an ding ang - Al Nassr tana khel mek Laporte hi a la ṭha reng em, tih chu zaninah fiah a ni dawn.

Spain-in Arsenal keeper David Raya nei mah se, La Feunte-a'n age level aṭanga a lo enkawl tawh Unai Simón bul ṭantir a thlang zawkin a rinawm a, Spain-in kil tinah duhthlan tur player ṭha an nei.

Croatia an ṭha

Midfield hi Croatia inchhuanna ber a ni ṭhin a, Luka Modric kum tam ve deuh tawh mah se, Al Nassr defensive midfielder Marcelo Brozovic leh Manchester City midfielder Mateo Kovacic te nen inkawp dawn miau avangin zuam ngawt chu an harsa ang tih a chiang!

City tana fullback-a season duhawm tak hmangtu Josko Gvardiol hi full back-ah nge centre back-ah an chhawr zawk ang hriatthiam a harsa a, a laiah a lut a nih chuan Ajax left back Borna Sosa chuan mual vei lam sir a chang thei ang.

Chuti a nih chuan Gvardiol leh Ajax centre back Josip Šutalo te an inkawp ang a, right back-ah Bayer Leverkusen player Josip Stanišić a ding ang. Si ban nghak turin Dominik Livaković a awm a, kum 29 mi keeper hi Fenerbahçe keeper niin, ram tan match 54 a khel tawh.

Tlarhmaah Dinamo Zagreb striker Bruno Petković chuan a lai lum a luah lehin a rinawm a, season hman zawh taka match 44-a goal 18 khungtu hi a ngaihtuahawm dawn lo - amah thlawp turin Hoffenheim tana match 31-a goal 17 khungtu Andrej Kramarić leh Hajduk Split winger Ivan Perišić te an awm.