Charity Match atan a ṭha zual 40

Mizoram Football Association (MFA) leh Mizo Professional Footballers' Association (MPFA) ṭangkawp chuan June 21, Zirtawpni khian Rajiv Gandhi Stadium, Aizawlah Charity Football Match a buatsaih dawn a, ISL leh I League-a Mizo player-te an inhmachhawn dawn.

Charity match khel turin ISL leh I League aṭangin player 20 ve ve thlanchhuah an ni a, player ṭha an kim hle. RG Stadium ngeiah India international player Lallianzuala Chhangte, Lalengmawia Ralte leh Edmund Lalrindika te an inkhel dawn a, hmaih phal chi a ni lo.

Team pahnihah a ṭhazual 20 ve ve thlanchhuah an ni a, team enkawltu tan chuan starting eleven thlan a la har dawn. Charity match khel turten June 18 & 20, 2024 tlai dar 4:00 hian RG Stadium-ah training an nei dawn a, a duh tan chhim theih a ni.

Cyclone Remal avanga chhiattawkte ṭanpuina inkhel en man hi Rs 100 chauh a ni a, zan dar 7:30-ah ISL leh I League player-te an inkhel dawn. Chutihrualin tlai dar 5:00 aṭangin en tur a awm ṭan tawh dawn.

Tlai dar 5:00-ah All Stars Football Match (Artistes, Musicians, YouTubers, Entertainers etc) te an inkhel dawn a, hemi zawh hian zai leh lam hmangin kal khawmte tan intihhlimna siam a ni bawk ang.

Tun ṭum Charity Match-ah hian Mizo player ṭhate an inlan kim dawn a, ISL player-te theihna hi RG Stadium-a en theiha awm ṭhin I League player-te hmaah fiahin an awm ang.