Mizoten chance in nei ṭha - Grand Master Prof.Hee Do Kim

Mizorama Taekwondo Federation of India(TFI) leh Kukkiwon, World Taekwondo Headquarters te ṭangkawpin an buatsaih, Taekwondo Poomsae hmasawnna tur seminar hmanga lo kal, Grand Master Prof.Hee Do Kim leh Grand Master Lee Jae Ku te chuan Mizote tan Taekwondo infiamnaah chance a ṭhat thu an sawi.

Grand Master Prof.Hee Do Kim leh Grand Master Lee Jae Ku te hian nimin khan Mizoram media-te nen inkawm hona hun an nei a, "Mizo mai ni lo, India mipuite hian Olympic player tam zawk chher turin theihna in nei a, sorkar leh player thawhhona a ṭhat a, sum a awm phawt chuan Taekwondo khawvel awp turin theihna in nei," an ti a, media-te chu Taekwondo chawi vul kawnga anmahni thlawp zel turin an sawm bawk.

Taekwondo Grand Master pahnih hi National seminar hmang tura lo kal an ni ber a, TFI chuan chuan Taekwondo Poomsae-ah hma a sawn theihna turin Kukkiwon, World Taekwondo Hqrs. atangin Grand Master te a chah a, seminar pekna hmun atan hian poomsae thiamna hmun deuh bik thlan niin, North East lamah Mizoram leh South/central India lamah Karnataka te an thlang a ni.

Ruahman dan chuan seminar hi July-ah neih tur ni mah se, Mizoram sorkar ngenna ngai pawimawhin TFI chuan Mizoram Sports Conclave-a an tel ve theihna turin ruahmanna an siam nghal a,

Grand Master lo kal pahnihte hi an sulhnu a hraw hle - Hee Do Kim hi Kukkiwon Professor niin, world champion ringawt pawh vawi thum lo ni tawh a ni a, 9th Dan Black belt a ni mek.

Lee Jae Ku hi International Taekwondo Poomsae leh Kyorugi coaching expert a ni a, India national team pawh vawi tam lo hrual tawhin, medal a lakpui nual tawh a, 8th Dan Black belt ni lai a ni thung.

Kukkiwon (World Taekwondo Headquarters sawina) hian mi bikte hnenah chawimawina an pe ṭhin a, chi hnihin chawimawina hi ṭhen a ni. Ram pum huapa taekwondo hmasawnna tura bei ṭha leh tihmasawntu/hmalatu technical mi (Black belt) hnenah chawimawina sang ber Letter of Commendation an pe ṭhin a, technical mi ni lem lo, khawtlang leh vantlang tana hna thawk ṭha, ram hruaitu leh taekwondo hmasawn nana tha thawhhlawkte hnenah Honorary Black belt leh Letter of appreciation an pe ṭhin bawk.

Tun ṭumah pawh hian Kukkiwon aṭanga lo kal Grand Master-te hian Mizoram chief minister Lalduhoma hnenah Letter of Appreciation leh Honorary Black belt 7th Dan an hlan a, Mizo zingah kum 2022 khan Lalfak Zuala IAS(Retd) chu Letter of Appreciation hlan a lo ni tawh.

Letter of Commendation hi Mizo zingah Zothanpuia(2002), Joseph Thansanga(2012) leh VLSawma(2012) te hnenah hlan a ni tawh a, kum 2012 khan khatihlaia Mizoram chief minister Lal Thanhawla chu honorary black belt pek a lo ni tawh bawk.

Grand Master-te hian Mizoram Amateur Taekwondo Association (MATA) hnathawh ṭhat avangin MATA president Prof.Rualkhuma Colney chu Honorary Black Belt an hlan a, World Taekwondo Headquarter Kukkiwon Technical(Black belt) mi chawimawina sang ber chu Master VLSawma leh Master Joseph Thansanga hnenah an hlan nghal bawk a ni.