A thiam pariat zingah Afghanistan an tel

T20 World Cup Super 8-ah Afghanistan an inlan dawn - Afghanistan hian Ningani zan khan Papua New Guinea chu wicket sariha hnehin, a thiam pariat zingah an hming an ziak kai a, an chak avang hian Super 8 lut tura New Zealand beiseina chu a thamral tel nghal bawk.

Brian Lara Cricket Academy, Tarouba-a inkhelah hian ṭhumvawrah Afghanistan an vannei zawk a, vawm hmasak an thlang. Papua New Guinea player-te over 19.5-naah an thi vek a, run 95 an tlin ve hram!

Run siam hnem ber Kiplin Doriga pawhin run 27 chiah a tlin a, an ropui lo hle. Afghanistan tan bowler Fazalhaq Farooqi chuan a hming chherin, wicket thum ngawt a la a, over li a vawmah run 16 chiah a pe bawk.

Afghanistan bat hun a thleng a, a tirah Papua New Guinea lamin an ti thei viau - Rahmanullah Gurbaz leh Ibrahim Zadran te lo ding chhuakin, Zadran hi over 1.4-naah a out nghal a, Gurbaz pawhin over thum a bat thleng hman lo.

Mahse, Afghanistan tan Gulbadin Naib chuan a theihna pholangin, ball 36 lekah run 49 ngawt a rawn siam a, Afghanistan hian over 15.1-ah run 101 siamin an target an um phak a, wicket thum chiah an hloh bawk.

Afghanistan hian an match hmasa pahnihah Uganda leh team ṭha New Zealand an lo hneh tawh bawk a, match thum an khelhah hnehna chang vekin super 8 an lut hma hle.

Hetihrual hian New Zealand tan Super 8 luh beiseina a tawp zui ve nghal. Black Caps hi an match hmasa pahnihah an chak zo lo ve ve a, Uganda leh Papua New Guinea la hmachhawn dawn mah se, an group aṭanga West Indies leh Afghanistan an tlin tawh avangin an tan kawng a awm tawh lo.