England beiseina a la thi lo

T20 World Cup khelh mekah a vawi khat nan England an chak a, champion lai hian an nomawi humhim ngei an duh tih pholangin, Oman chu wicket riat ngawtin an sawp a ni.

England hi ṭhumvawra vannei zawkah an ṭang a, Sir Vivian Richards Stadium, North Sound-ah vawm hmasak an thlang. Oman hi over 13.2-ah an out vek a, run 47 chiah an siam!

Ningani zan inkhelah hian England tan Jofra Archer leh Mark Wood ten wicket thum ve ve an la a, Oman tana run 10 siam tling awmchhun Shoaib Khan chuan run 11 a siam ve thei hram.

England bat hun a thleng a, an target neih zat um phak turin harsatna an tawk lo - over 3.1 lekah run 50 siamin an target an khum a, wicket hnih chiah hloh chungin hnehna an chang.

Zanin dar 10:30-ah England hian Namibia an hmachhawn zui dawn a, hnehna an chan a, Scotland-in team ṭha Australia an ngam loh bawk chuan champion lai hi Super 8 khel turin an tling thei dawn - Australia leh Scotland hi June 16, Pathianni zing dar 6:00-ah an inhmachhawn ang.

Super 8 lut chiang tawh India chuan zanin dar 8:00 hian Canada an hmachhawn dawn a, Pathianni zan dar 8:00-ah Pakistan leh Ireland an inkhel bawk ang - nizan khan USA leh Ireland an inkhel a, US hi an chak chuan Pakistan hian Super 8 khelh beiseina an nei thei tawh dawn lo.