Indo thlawhtheihna lei turin Turkey leh US inrem

Turkey Defence Ministry chuan US indo thlawhtheihna, F-16 lei turin inremna an siam tih Ningani khan a puang. Turkey chuan F-16 warplanes lei tur hian USD tld 23 a seng dawn a ni.

Defence ministry chuan inremna ziah fel a nih tawh thu leh ram pahnih aiawh palaite chuan inremna chipchiar zawk an buapui mek tih a tarlang. He inremna an ziah hmang hian Turkey chuan F-16 indo thlawhtheihna 40 chu US hnen aṭanga an lei bakah, indo thlawhtheihna an neih sa 79 chu chei ṭhat a ni bawk ang. US state department chuan kar liam ta khan Turkey nen F-16 lei chungchangah inremna an nei dawn hnai tih hi a lo puang tawh a, an indo thlawhhtheihna ṭha mi chu US ṭhianṭha hnenah lo chuan an hralh ngai lo tih an sawi bawk.

Turkey hian Sweden NATO member nih a pawmpui theih loh vangin US chuan Turkey-in F-16 lei a tumna a pawmpui thei bik lo a, kumin January thla khan Turkey parliament-in Sweden NATO member nihna a pawmpui hnuah US hian F-16 lei hi a phalsak chauh a ni. US dan angin January thla khan US state department chuan Turkey hnenah F-16 hralh an phal thu leh, Greece hnenah F-35 an hralh dawn tih hi Congress hnenah an hriattir a ni.