UK-in Moscow stock exchange a hrek tih a puang

United States hnungzuiin United Kingdom chuan Russia ram hrekna hrang hrang a tichhuak a, heng zingah hian Moscow stock exchange hrekna pawh a tel. Hetianga UK a chet chhan chu Ukraine a beihnaah Russia-in a tha a thlah theih nan a ni.

UK chuan he hrekna hian Russia sum dinhmun a nghawng bakah an ralthuam siam chhuah nana sum thawh ṭhinte a nghawng dawn niin a sawi a, he thutlukna hi G7-a an thawhpuite nena an siam niin a tarlang bawk. US pawhin tun hnai mai khan Moscow stock exchange leh a kaihhnawih dangte hrekna a lo ti chhuak tawh a, hemi vang hian ramdang mi Russia rama investment tite an buai phah hle.

Prime minister Rishi Sunak chuan Ukraine-in a ram zalenna atana a beihna chu UK chuan an thlawp tlat dawn a ni, a ti. UK hrekna siam chuan Russia sum leh pai dinhmun chu dinhmun khirh takah din tir a tum tih sawiin, hei hi a hlawhtling a nih chuan Russia chuan indo hmachhawn nan sum a nei dawn lo niin a sawi. Sunak chuan Russia president Vladimir Putin chu a chak loh a ngai a, chumi atan chuan indonaa sum hman tur a neih loh hi a pawimawh a ni, a ti.