Everton-in Branthwaite man an chhiar to

Manchester United chuan Everton defender Jarrad Branthwaite lakluh an duh a, mimal angin inremna neihpui tawh mah se, Merseyside club hian an player man zat atan pound maktaduai 80 an chhiar hem mai - a sang mah mah an ti ve mai thei!

Kum 21 mi defender hi Everton hian a theih chuan chelh hram an duh a, an chelh thei lo a nih pawhin man to taka hralh an duh. Merseyside club hian an defender hi Harry Maguire leh Josko Gvardiol te huangah an dah a, tlawm taka hralh an tum lo.

Maguire hian kum 2019 khan Leicester City aṭangin Old Trafford a pan a, Manchester United hian a man zat atan £80mtd ngawt an inseng. Season hman zawh tak ṭan dawn khan Gvardiol-a'n RB Leipzig aṭangin Manchester City chu £77mtd-in a zawm ve bawk.

Everton hian player pahnih huangah an defender an dah miau a, £80mtd aia tlawm a manah dawn an tum lo. Tun Euro 2024 squad-ah Branthwaite tel lo mah se, Three Lions tan regular a la nih thuai Everton hian an beisei a ni.

Chutihrual chuan Merseyside hian an club dinhmun chinfel nan sum an mamawh tel bawk a, May thla khan Everton director of football Kevin Thelwell chuan players ṭhenkhat hralh an ṭul thu sawiin, fan-te chu an dinhmun hrethiam turin a ngen hial.

Hei vang hian tun season-ah pawh player hralh nual chu an duh ngei a, mahse, man tlawm taka hralh erawh an tum lo - chutihrual chuan tun dinhmuna dawrtu United hi sum lamah an ropui lutuk bik lo a, Premier League profit and sustainability rules (PSR) bawhchhe lo turin insiamrem dan an ngaihtuah mek.

United hian an coach Erik ten Hag chu an hnenah a cham zel dawn tih an tichiang tawh a, mahse, squad thar din an tum avangin first team squad zawng zawng deuhthaw chu chhuahtir an hnial lo nia sawi a ni . Jadon Sancho chu tun dinhmuna hralh theih dinhmuna ding a ni a, a man atan pound maktaduai 40 an chhiar tawh.

Hetihlai hian French defender ṭha Raphael Varane chuan Old Trafford a chhuahsan fel tawh a, kum 36 mi Jonny Evans erawh chelh an tum lawi! Northern Ireland international hi hliam vangin talbuai fo mah se, United chuan an hnena cham zel turin indawrna an neihpui mek.