Pulev-a'n December-ah Joshua hmachhawn a tum

Bulgarian boxer Kubrat Pulev chuan British boxer rothap Anthony Joshua nen December 12 khian London khawpuiah an inhnek tur thu a sawi a, he world heavyweight title bout hi boxing ngainatute chuan an nghakhlel khawp ang. 

Pulev chuan, "Official a ni ta e: Pulev vs Joshua chu London-ah December 12 khian a thleng dawn," a ti a, "Hawikirna tur a awm tawh lo, inhnek hun tur pawh sawn buai a ni tawh dawn lo - a ṭha zawkin hnehna chang rawh se," tiin facebook lamah a ziak zui bawk.

Kum 30 mi Joshua hian December khan Saudi Arabia-ah mak tak maia a lo hneh loh tawh Andy Ruiz Jr. chu hneh letin WBA, IBF, WBO leh IBO heavyweight title a la let a, Pulev hi IBF lamin a hnek tura an chhawpsak a ni. 

October 2017 khan boxer pahnih hi intawng tura tih an lo ni tawh a, mahse dar hliam vangin Pulev hi a inhnukdawk - boxer pahnih hian contract an ziak tawh niin Pulev hian a sawi a, Covid-19 vangin entu an awm dawn leh dawn loh a la chiang lo.