West Ham-in Guilherme an la

Premier League club West Ham chuan Brazilian winger Luis Guilherme chu Palmeiras aṭangin pound maktaduai 25.5-in an la lut a, kum nga chhung atan contract an ziahpui.

Kum 18 mi Guilherme chuan, "Ka chunga rinna nghattu West Ham ka zawm thei hi ka lawm takzet a ni," a ti a, Hammers-in an hmachhawp an hrilhte chuan amah leh a chhungte a hmin thu a sawi.

West Ham hian coach David Moyes nen an inṭhen hnuin, manager Julen Lopetegui kaihhruaina hnuaiah indinthar an tum mek a, Guilherme hi an player lakluh hmasak ber a ni.

Guilherme hian kum 17 mi lek ni chungin, kum 2023 khan Palmeiras tana a match hmasa ber a khel a, Copa Libertadores thlenga khel tawhin, a kum phu loin tawnhriat a nei ṭha.

Brazilian winger chuan, "Premier League hi khawvela league ṭha ber a ni a, West Ham-ah hian hmasawnna tam tak ka chhar belh ngei ka inbeisei - chu chu ka kal zelna tur atan pawh a pawimawh dawn a ni," a ti.

Hammers hian David Moyes-a kaihhruaina hnuaiah Europa Conference League nomawi hial an chawi a, season hman zawh takah khan Premier League table-ah pakuana dinhmun luahin season an khar.