AC Milan coach thar Paulo Fonseca

Italian club AC Milan chuan Lille coach hlui Paulo Fonseca chu an manager thar turin an la lut a, Portuguese coach hian kum thum chhung atan contract a ziak - kum 2027 thleng chu Serie A club langsar hi a enkawl dawn tihna a ni.

Kum 51 mi coach hi football coaching-ah a mikhual lo. Club langsar tak tak zingah FC Porto, Shakhtar Donetsk, AS Roma leh Lille a lo enkawl tawh a, Lille hi Milan hmaa a enkawl hnuhnung ber niin, 2022-24 inkar kha a enkawl.

Coach anga a hlawtlin berna hmun erawh Shakhtar Donetsk niin, Ukrainian club hi Ukrainian Premier League leh Ukrainian Cup-ah vawi thum ve ve a champion pui a, Ukrainian Super Cup-ah vawi khat a champion bawk.

Fonseca chuan, "AC Milan manager ka ni thei hi ka lawm takzet a, he club leh a sulhnu ropui takte chawi nung turin theihtawp ka chhuah ang," a ti.

Roma boss hlui Fonseca hian Serie A nomawi hial lo chawi tawh Stefano Pioli chu a thlak dawn a, Pioli hian inhriatthiam tawnnain season tawp rual khan AC Milan hi a chhuahsan.

Fonseca chuan, "Kan zavaia thawk hoin, a ṭha thei ang ber result nei turin theihtawp kan chhuah dawn a, hlawhtlinna duhawm tak, kan fan-te nen hlim taka kan lawm theih tur kan thlentir theih ka beisei," a ti.

Season hman zawh takah khan Fonseca hian Lille chu Ligue 1-ah palina a nihpui a, automatic-a Champions League khel tura tling phak loin, French club nen hian inhriatthiam tawnnain an inṭha ṭhen a ni - Europa Conference League-ah Lille hi quarterfinal a hruai thleng bawk a, mahse, penalty-ah Aston Villa an ngam lo.