Zanin 12:15-ah England Vs Denmark

England-in zanin dar 12:15 hian Wembley Stadium-ah Denmark an mikhual dawn a, an inhmachhawnna tur hi Nations League ni mah se Three Lions inkhel a nih tawh chuan ngaihven a hlawh ṭhin. 

Gareth Southgate-a hote hi League A group 2-ah hmahruaitu an ni mek a, match thum khelh aṭangin point sarih an hmu tawh. Zanin hian an group-a pahnihna Belgium-in Iceland an hmachhawn ve bawk ang.

England no. 1 keeper chu Jordan Pickford a ni a, Everton keeper elpui tur hian Nick Pope leh Dean Henderson te an awm bawk.

Manchester United legend Peter Schmeichel chuan, "Pickford hian Premier League-ah tihsual a nei fo a, Henderson hi club tan league-ah inlan pha lo, Pope hi league table mawng lama awm Burnley keeper a ni," tiin England keeper te an ṭhat tawk loh thu a sawi.

Denmark tana vawi 129 inlan thei Schmeichel hian England-in no. 1 dik tak an neih hnuhnun ber chu David Seaman a nih thu a sawi a, hemi hnua England keeper Joe Hart, Paul Robinson, David James leh Rob Green te chuan Arsenal keeper hlui hi an tluk phak loah a ngai.

England-in friendly match-a Wales 3-0 an sawp ṭumin captain Harry Kane an hahchawlhtir a, Nations League-a Belgium an hneh ṭumin Tottenham striker hian minute 66-naah Dominic Calvert-Lewin a thlak.

Zanina Denmark nen an inkhelh turah hian Kane hi bul ṭan tur anga ngaih a ni a, Spurs manager Jose Mourinho chuan awl turin a duh thung. Southgate chuan, "Spurs nen hian Kane a dinhmun chungchangah kan inbia. Hliam a nei lo a, a tihrawl a rawl deuh avangin kan hahdamtir mai a ni. Inrintawkna a neih nan Belgium nen kan luhtir a, Denmark nen chuan bul a ṭan thei tawh ang," tiin a sawi a, Mourinho tan thu hriat nuam a ni lo ang.

Aston Villa-in Liverpool 7-2 a an sawp ṭumin captain Jack Grealish chu star player a ni a, England-in Wales 3-0 a an hneh ṭum pawhin Grealish hi player hmuhnawm berah a ngaih theih. 

Heti chung hian match pawimawh zawka ngaih Belgium lakah erawh Grealish hi bench-ah a ṭhu tluan a, Southgate hian a duhsak tawk loa ngaitu an tam hle. Chutihrualin club leh ram tan match a tam avangin England boss hian player a siksawi hret a rinawm a, Belgium nen an inkhelh ṭuma bench aṭanga lut Jadon Sancho a inlan ngei a rinawm laiin Grealish dinhmun erawh a chiang lo.