Wilder hmachhawn a tum lo Fury

WBC heavyweight title kawltu Tyson Fury chuan Deontay Wilder hmachhawn a tum tawh loh thu a sawi a, British boxer rothapin Wilder hmachhawn a tum loh chhan hi an inhnek hun sawn an tum reng vang a nih thu a sawi. 

Kum 32 mi Fury hian February khan Wilder hi hnehin WBC heavyweight title a kawl lai chu a chhuhsak a, kum 2018 khan inhnehtawka puan an lo ni tawh bawk - contract-ah inhnek nawn theihna dan an ziah tel avangin a vawi thum nan inhnek an tum a ni. 

Boxer pahnih hi a tirah chuan July a inhnek tura tih an ni a, a hnuah October atan sawn leh a ni a, December sawi rik leh a ni bawk. Fury chuan, "December 19 a inhnek ka remti a, mahse, a ni thlaka nakkum lama sawn leh an tum a ni.

"Theihtawp chhuahin ka training a, ka inpeih takzet. Mahse, December 19 a kan inhnek tur sawn leh an tum kha chuan a tawk zozai tawhin ka hria a, hmachhawp dang ka nei tawh a ni," a ti. 

Fury hian twitter lamah December a fight dang hmachhawn a tum thu a tarlang a, August 2018 hnua a inlan tawh lohna, an ram UK lamah inhnek hi hmachhawn a tum niin a sawi. 

US media lamin an tarlan dan chuan Fury leh Wilder inhnek theihna contract hi a tawp tawh niin an tarlang a, mahse American fighter hian Fury hi inremna neihpui theih hram a beisei a ni.