Croatia tan Spain an sang lua!

Inrinni zanah European Championship 2024-a game nghahhlelhawm ber pawl en tur a awm nghal a, Spain leh Croatia an intawng - game inhnehtawk tak tura ngaihah Spain an chungnung a, anmahni ang thoa champion beisei Croatia chu 3-0 in an hneh.

Spain tan Álvaro Morata, Fabián Ruiz leh Dani Carvajal ten goal khat ṭheuh an khung a, hun tawp thlenga goal dang a awm loh avangin Spain an chak chiang hle - group of death aṭanga tal chhuak turin an dinhmun a ṭha nghal.

Group B inkhel dangah Italy chuan 2-1 in Albania an hneh a, Croatia tan hmabak a hautak sawt. Thawhlehni zana Albania an hmachhawn hunah hnehna chan ngei an mamawh dawn - an hmabakah Italy an awm leh dawn a, a awlsam lo ang.

Spain an thiam

Luis Enrique hnuaiah Spain-in passing game khelin, duhthala ball an in pass kual hnuah a hmawr bawk an tum ṭhin - kha game kha ṭhenkhat chuan 'boring' an ti a, mi tam tak erawhin football a chei mawi zual bikin an hre ṭhin.

Mahse, coach Luis de la Fuente kaihhruaina hnuaiah Spain-in an khelh dan phung an thlak a, possession ringawt chu thupui berah an nei tawh lo - a bik takin counter attack-ah full back an ṭangkai zual a, chu chu Croatia lakah pawh kan hmu.

Team pahnihin awmze neiin an innawr lawk thei lo a, minute 29-naah goal kan hmu. Croatia tlarhnung mutthlu chu Fabian Ruiz-a'n hmuin, a laiah mawi zetin ball a thlawh lut a, hei hi captain Alvaro Morata chuan tlan luhpuiin goal-ah a chantir a, Croatia keeper Dominik Livakovic tan tih theih a awm lo - Morata hi second half-ah inhliam mahse, a ngaihtuahawm lo.

An phur laklawh!

Croatia-in ball chang tam mah se, awmze neiin Spain an nawr hleithei lo a, hei hi an tuar. Minute 32-na lekah Fabian Ruiz a inlar leh a, Paris Saint-Germain midfielder hian Pedri siamsak chu Croatia tlarhnungte a lam khum hnuah mawi zetin a khung - ava thiam tak!

Olympiastadion-a fans ngah zawk Croatia an hawihai a, Euro ṭan hma lawka Portugal hnehtu team hi an inrintawkna zawng zawng lak kiansak an ni ta em ni chu aw, tih mai tur a ni. First half hun pek belh a ni a, Spain bawkin goal an khung.

Rawlthar hmuhnawm em em mai Lamine Yamal chuan corner aṭanga ball kal chang fuhin, Carvajal tan a siamsak a, Champions League final-a Real Madrid tana goal khungtu hian Euro 2024-a an match hmasa berah Spain tan a khung leh ta.

Croatia an chuai

Luka Modric hoa inlan Croatia-in chance nei lo tawp an ni bik lo a, mahse, an chhawr tlat lo. Minute 78-naah Spain midfielder Rodri chuan Bruno Petkovic a titlu a, referee-in penalty spot a kawk a, Rodri-a'n red card a hmu lo chu a vannei takzet.

Mahse, Petkovic hian penalty hi goal-ah a chantir thei lo. A let lehlam chu chhuih lut mah se, pawmsak a ni lo - Petkovic-a'n penalty a pet hmain Ivan Perisic a lo tlan lut hman a, a goal loh hnuah Petkovic hi a lo siamsak bawk.

Video assistant referee hmanga ennawn a nih hnuah pawmsak an ni lo a, referee thutlukna a dik. Croatia tan Josko Gvardiol-a'n a chance neih a chhawr lohte chu uiawm a tling a, a khaikhawmna erawh Spain an thiam zawk a, chak an phu.

Aw naupang...

Barcelona winger Lamine Yamal chuan Spain tan inkhel bul a ṭan a, kum 16 leh ni 338 mi niin, Euro chanchina player inlan thei naupang ber a ni - a naupang ber hi khelmualah Croatia player-ten an um leh dul dul ṭhin!

Spain goal khung pathum zinga goal hnih chu Yamal thawhchhuah tia sawi theih a ni a, he rawlthar hi a hmuhnawm takzet. Heng zawng zawng aia mipui mak tih erawh Spain-in game 'direct' tak an khel chu a ni a, ball chan tam lamah an rilru an pe vak tawh tlat lo.

Croatia lakah 46.7% ball changin, Croatia aiin an chang tlem zawk daih a, kum 16 hnua an khingpui aia Spain-in ball an chan tlem zawk vawi khatna a ni. A tawpah erawh Spain an chak a, ball chan tlem lamin an rilru a luah thui lo ang.