Euro khel turin Ukraine an inpeih

Russia-in an ram a run avangin Ukrainian mi tam takin an ram an tlanchhiatsan a, hetiang boruak karah hian Ukraine chuan zanin dar 6:30 hian Euro-a an match hmasa ber an khel dawn - Romania an hmachhawn ang.

Ukraine defender Oleksandr Zinchenko chuan, "Kan ramin hun harsa a tawh lai a ni tih kan hre vek a, min fuih phur tur thil dang hi kan mamawh tawh chuang lo reng reng.

"Kan fan-te hi stadium leh television aṭanga min thlirtute ngawt an ni lo a, kan zalenna atana an nunna thap mektute pawh an tel. Ukrainian emblem awmna ngei jersey kan hak hian, a hma aia a let thumin kan thathona hi tihsosanin a awm ṭhin," a ti a, zaninah Romania hneh an tum dawn.

Romania coach Edward Iordanescu pawhin an inkhel tur thlirlawkin, "Hun duhawm bik a ni a, coach zawng zawngin hetiang hun atan hian hna an thawk a, hetiang hun thlen châk hian duhthu an sam fo ṭhin.

"Kum riat zet hnuah European football-a ram ṭha tak takte nena inel turin kan lo kir ve leh ta a, team ṭha tak, theihna sang tak nei kan din thei a, chu nen chuan inelna kan hmachhawn dawn a ni," a ti a, a inringtawk hle.

Ukraine-in Arsenal defender Zinchenko bakah Girona striker ṭha Artem Dovbyk, Chelsea forward Mykhaylo Mudryk, Everton defender Vitaliy Mykolenko leh Real Madrid goalkeeper Andriy Lunin te an kawl a, Romania-in player langsar sawi tur an nei lo.