Italy-in Albania an lehthal

Euro 2024-a 'group of death' hminglem an pek group B-ah champion lai Italy, Croatia, Spain leh Albania an awm - hei vang hian vawi khat chak loh a pawi thui thei tih a chiang a, a bik takin ram lian pathum Italy, Croatia leh Spain tan Albania laka point thum hmuh loh chu thil pawi thui a ni thei.

Inrinni zanah Italy an hlauthawng hman hle - match hmasa berah Albania an hmachhawn a, Nedim Bajrami chuan second 23-na lekah a khung nghal a, Albania lam tlarhnungah an tawm zui avangin a harsa dawn tih a chiang.

Mahse, Euro 2020 champion Italy an insiamrem vat a, an hawikir tawh lo. Minute 11-naah Alessandro Bastoni chuan Lorenzo Pellegrini siamsak chu goal-ah a chantir nghal a, minute nga hnu lawkah Nicolo Barella chuan yard 20 vela hla aṭangin a khung ve leh bawk.

Chawlhlawk an hman meuh chuan Italy hian 72.2% ball an chang a, vawi 13 ngawt shot an nei hman! Azzurri vanneih zan ni se, goal tam zawk khung thei an ni. Mahse, Albania goalkeeper Thomas Strakosha a che ṭha a, Davide Frattesi leh Gianluca Scamacca 'shot' a dansakte chu pui tak a ni.

Italy tan Arsenal midfielder Jorginho chu a 'solfa' vaitu ber a ni a, midfield-ah a che vel a hmuhnawm hle. Hetihlai hian Juventus winger Federico Chiesa chu Albania tan a hnawk takzet a, he Italy team hian an nomawi humhim turin team an nei ṭha tawk tih hmuhtirin kan awm - June 20 zana Spain nena an inkhel tur hi en a châkawm ta hle.

Italy coach Luciano Spalletti chuan, "Coaching hna ka chelhtirh aṭang hian hnehna chan chu thil pawimawh ber a nih thu hrilh ka ni ṭhin a, a pawimawh ber zawk chu khelh ṭhat a ni. Euro 2024-ah champion kan tum a nih chuan football hmuhnawm tak kan phochhuah a ṭul.

"First half-ah kan tawlh hnung hret a, kha vang khan Albania lamin an tharum neih chhawr ṭangkaiin min nawr thei tlat. A pawimawh ber chu kan khelh dan phunga rinna kan nghah tlat reng hi a ni," a ti a, nomawi chawi a tum.