Eng pawh a thleng thei - KDB

Belgium chuan zanin dar 9:30 hian European Championship 2024-a an match hmasa ber an khel dawn a, Slovakia an hmachhawn ang. Belgium hi Roberto Martinez-a kaihhruaina hnuaia 'golden generation' an tih kha an chuai ṭan tawh a, ṭum dang angin champion tura rinkai zinga chhiar tel an harsa tawh.

Mahse, Belgium captain Kevin De Bruyne chuan thil eng pawh thleng thei a nih thu a sawi. Manchester City thiampuipa chuan, "Ziakah chuan keini aia champion tura rinkai zawk an awm nual. Mahse, tournament-ah hi chuan a pawimawh ber chu khelh tluan fuh a ni ber.

"Chutianga kan tih phawt chuan eng pawh a thleng thei a, Euro khel tura kan inbuatsaih anga kan khelh chhunzawm theih ka beisei," a ti a, champion nomawi beiseia Germany pan an nih thu a sawi.

Belgium hian 'golden generation' aṭangin player la kawl nual mah se, khang hunlai nen kha chuan khaikhin chi an ni tawh lo. Goalkeeper Thibaut Courtois chuan season tluan deuhthaw hliama hun a hman avangin Belgium squad zawm loh a thlang a, hei ringawt pawh hi chânna a tling.

Courtois hian a hliam neih chhuanlam mah se, Champions League final pawh ṭha taka a khelh tho avangin Belgium manager Domenico Tedesco nena an inkar boruak vang a nih a rinawm zawk a, a mil loh coach tana khelh a tum lo.

Hei mai a ni lo - an vanglaia defender ṭha Toby Alderweireld leh Thomas Vermaelen bakah player thiam bik, captain ṭhin Eden Hazard te an awm tawh lo a, Jan Vertonghen chu squad-ah la awm mah se, kum 37 mi a ni ve tawh bawk.

Hetihrual hian KDB bakah Romelu Lukaku, Leandro Trossard, Jeremy Doku, Youri Tielemans leh Axel Witsel te ho an la awm a, Belgium hian football khawvel barakhaih turin theihna an ni - group stage na na na hi chu harsa loa paltlang mai tura ngaih an ni.

Hetihrual hian coach Tedesco erawh a la ṭawng fimkhur hle. February 2023 aṭanga Belgium enkawl ṭantu Tedesco chuan, "Kan group awmna tur a chian khan mi tam takin group stage chu harsatna awm loa paltlang mai turin min ngai a, a thu chuan a dik reng a, mahse, football chu khelmualah khelh a ni tlat.

"Kan hmachhawn tur team-te hi uluk takin en ila, Slovakia hian qualifier-ah khan vawi hnih chiah tlawm an nei a, chu pawh Portugal lakah ve ve a ni a, 1-0 leh 3-2 a ni. Hei hian an theihna a pholangin ka hria," a ti.

Paris Saint-Germain centre back Milan Skriniar hoa inlan tur Slovakia hian player langsar vut ngah lo mah se, European top five league-a khel an nei nual a, Belgium tan a awlsam dawn lo.

Belgium hi coach Tedesco hnuaiah match 14 khel tawhin, tlawm an la nei lo a, he record hi an chhawm nung zel thei dawn em, zaninah a hriat ang.