German ral a lian e

Euro 2024 ṭan hmain Germany-in hlauhthawnna leh rinhlelhna an ngah a, Zirtawpni zana Scotland an hmachhawn zawhah erawh Julian Nagelsmann-a kaihhruai team-in champion turin theihna an nei tih a lang.

Allianz Arena-ah inelna thlengtu Germany-in Scotland 5-1 in an sawp a, mualneitu tan Florian Wirtz, Jamal Musiala, Kai Havertz, Niclas Fullkrug leh Emre Can ten goal khat ṭheuh an khung. Scotland goal awmchhun pawh hi Antonio Rudiger-a'n anmahni lama a tihluh a ni.

Group A inkhel dangah Switzerland-in Hungary 3-1 in an hneh a; June 19, Nilaini zan dar 9:30-ah Germany-in Hungary an hmachhawn ang a, zan lai dar 12:30-ah Switzerland leh Scotland te an inkhel ang. Germany leh Switzerland te hian hnehna an chang a nih chuan match hnih khelh zawhah last 16 an lut thei ang.

An tho ta

Germany-in World Cup 2014 nomawi an chawi hnu khan lawmna tur an hmu khat hle. World Cup hnuhnung pahnihah group stage an paltlang zo lo a, Euro C'ship hnuhnung bera an thlen chin pawh last 16 chauh a ni.

Nagelsmann-a'n team thar din tumin player a enchhin a, left back-ah Kai Havertz hmangin player a zir chiang nasa hle. Euro 2024-ah duh dan nghet a nei a, match hmasa bera a player thlan dan pawh mi nawlpui rinlawk dan tiin a sawi thei.

Toni Kroos rawn let chu team danglamna a ni a, team khaipa a ni. Minute 10-na lekah Kroos-a ball vawrhluh chu Joshua Kimmich-a'n changin ani hian Wirtz tan a pe a, Leverkusen star hian goal ṭha zet a khung.

Germany-in Kroos hmangin ball a sawi a, player hmuhnawm ber erawh Musiala a ni a, Bayern Munich midfielder hi a thiam thlawt. Minute 19-naah Ilkay Gundogan-a ball pek chu Kai Havertz-a'n changin, Arsenal forward pek let chu Musiala-a'n ṭha zetin a pet goal.

A goal zel

Wirtz leh Musiala te an thiam a, game an ti mawi tel bawk. Scotland-in chet ngaihna an hre lo a, Germany-in inkhel an thunun. First half tawp hmain Gundogan-a'n penalty a hlawh chhuak a, Kai Kavertz-a'n keeper bum nan hmangin first half-ah 3-0 a ni.

Second half-ah Niclas Fullkrug a rawn inlan a, Borussia Dortmund striker hian goal awmna a hria. Germany no. 9 hian minute 68-naah Fullkrug-a'n kawh zetin a pet goal.

Fullkrug hian minute 75-naah Thomas Muller-a siam chu a ti lut lehah a inngai a, mahse VAR hmanga ennawn hnuah pawm a ni lo. Scotland an vannei a, minute 87-naah Antonio Rudiger-a'n an lamah a tilut - Manuel Neuer tan dan ngaihna a awm lo.

Germany-in goal an chhuah hnuah tha an thlah lo a, substitute Emre Can-a'n injury time-ah a khung belh. Can hi Aleksandar Pavlovic damloh vanga koh leh hnuhnawh ni mah se Germany match hmasa berah goal a khung nghal.

Cham rih la

Euro 2024 zawhah Toni Kroos-a'n football khelh a chawlhsan dawn a, Germany-in final an thleng a nih chuan Kroos-a inkhel hi match ruk a la en thei ang. Scotland lakah Kroos hian vawi 102 pass chhuakin vawi 101 a pass dik a, a theihna sang tak avang hian chawl tur chuan a la uiawm hle.

Kroos hi kum 34 mi chauh a ni a, thutlukna a siam awh avangin football ngainatuten ngenngawl mah se a khelmualah a inlan dawn tawh lo. Chutihrualin tun ṭumin inelnaah Germany a champion pui a nih chuan a record hi a hlu lehzual ang.

Kroos hian FIFA World Cup (1), Champions League (6), UEFA Super Cup (4), Club World Cup (6) bakah league nomawi pasarih leh knockout inelna pali (DFB Pokal leh Copa Del Rey) te a chawi tawh a, Euro C'ship nomawi a la chawi lo thung.

Germany hian kum 1996 hnuah Euro C'ship-ah an la champion leh lo a, Kroos hoin a champion thei ang em tih chu hunin a hril ang.ṭ

"A tir minute 20 chhung kha chu kan khel ṭha takzet. Kan nawr tawm a, thahrui kan ngah bawk a, kha khan nasa takin minpui a ni. Goal khat khung hma bakah a tawp thlengin rilru kan pe a, kan khel ṭha takzet. Mahse, hei chu hna hmasa chauh a ni a, hmabak a la tam."
- Julian Nagelsmann, Germany coach

"Ṭantu kan nei ṭha a, khatiang boruak kha team-in kan mamawh. An goal khung khan, vawi khat tihsual pawizia min hriat nawn tir. Hei hi kan tan inzirna tur ṭha tak a ni thei ang."
- Ilkay Gündogan, Germany captain

Switzerland-in bul an ṭan ṭha

Euro 2024-ah Switzerland-in chakin bul an ṭan a, Inrinni zan khan Hungary chu 3-1 in an hneh. Cologne Stadium-a inkhelah Kwadwo Duah-a'n Switzerland tan goal hmahruai a khung a, coach Murat Yakin-a'n Duah a tel chhan chu a chiang nghal.

Ludogorets Razgrad striker Duah tel hian mak tih a hlawh a, mahse Yakin hian box chhungah a ṭha tih a hria a, inelna takah pawh a rinlak.

Michel Aebischer-a'n first half-ah Swizertland tan a khung belh leh bawk. Second half-ah Switzerland insiamṭhain Liverpool midfielder Dominik Szoboszlai ball pek ṭha chu Barnabas Varga-a'n goal-ah a chantir a, inkhel a nung hle.

Mahse, injury time-ah defender tihsual chu substitute Breel Embolo-a'n remchangah lain goalkeeper Peter Gulacsi chu mawi zetin a pet khum. Switzerland 3-1 in an chak a, hnehna an chan theih nan midfielder Granit Xhaka a khel ṭha takzet.