Champion lai England-in Super 8 an lut
T20 World Cup-ah champion lai England-in ruah leh Namibia hnehin Super 8 an lut. India, United States, Australia, England, Afghanistan, West Indies leh South Africa ten Super 8 an lut tawh. Hmunruak pakhat la awm hi vawiin hian chinfel a ni dawn a, Bangladesh-in tukin zing inkhelah Nepal a hneh chuan a sang pariat zingah an tel thei ang.
Boruak a ṭang
England-in Inrinni zan khan Sir Vivian Richards Stadium-ah Namibia an hmachhawn a, chak ngei an mamawh. Three Lions tan Namibia hneh hi thil awlsam ni mah se Antigua-ah ruah a sur miau avangin inkhel lo thei dinhmunah an ding.
Group A lamah phei chuan India leh Canada bakah United States leh Ireland te inkhel tur phei chu ruahsur vangin an khel thei lo. Chutihrualin anni lamah chuan India leh US ten Super 8 an luh tawh avangin inkhel pawimawh a ni tawh lo. US hian group stage an paltlang theih nan team ṭha Pakistan an hneh tih hriat a ṭha.
England-in ruahsur ban hun an nghak a, a tawpah an nghak chhuak. Over 20 chu ruahsur vangin over 11-ah pawh tawi a ni a, Three Lions hian over 10-ah 122/5 runs an siam pha tho a, ruah a sur avangin over 11-na erawh an khel thei ta lo. DLS method hmangin chhut a ni a, Namibia target chu 126 a ni.
Namibia batter-te khel chhe lo mah se target a sang hret a, over 10-ah 84/3 runs chauh an siam. England hi 41 runs-in an chak a, Super 8 lut turin Australia puihna an la mamawh tho. Aussies-in Scotland an hneh chauhin Super 8 an lut dawn.
A hot zel
Nimin zing khan Australia leh Scotland an inkhel a, Beausejour Stadium-ah inkhel hmuhnawm chhawp chhuah a ni. Scotland-in Brandon McMullen (60), Richie Berrington (42*) leh George Munsey (35) te an che ṭha a, over 20-ah 180/5 an siam.
Namibia hneh vanga thinphu muang tawh England thinpu a rawn rang leh ta a, Super 8 lut lo thei dinhmunah an ding nawn. David Warner (1), Mitchell Marsh (8) leh Glen Maxwell (11) ten run tam siam loin pavillion lamah an kir a, Australia chak lo thei dinhmunah an ding.
Mahse, opener Travis Head-a'n 68 runs siamin over 16-naa six vawi thum ngawt a vaw chhuak chuan inkhel kalhmang a tidanglam. Over tawp berah Australia tan run nga chauh siam a ngai a, chutihrualin Tim David-a ball vuak Chris Sole-a man loh erawh Scotland ṭantuten pawi an ti khawp ang. Tim David-a'n a tawp khar nan six runs a siam a, Australia wicket ngain an chak.
Super 8 chu
Super 8-ah hian team ṭha pariat chu group hnihah pali ve vein an ṭhen a, vawi khat ṭheuh an inkhelh kual hnuah group pahniha a sang pahnih ve vein semifinal an lut ang.
Group A-ah India, Australia leh Afghanistan te an awm a, hmunruak pakhat hi Bangladesh-in an hnawhkhat a rinawm. Group B-ah England, South Africa, United States leh West Indies te an awm bawk.
Super 8 hi June 19, Nilaini aṭangin khelh ṭan a ni dawn a, semifinal hi June 26-27, 2024-a khelh tur niin final hi Kensington Oval, Bridgetown-ah June 29, Inrinni zanah khelh a ni ang.