Ronaldo hian 'Record' a siam thei ang em?

Nations League-ah zanin dar 12:15 hian Portugal-in Sweden an mikhual dawn a, Cristiano Ronaldo hian ram tana goal khung tam ber record siam turin goal kua chiah a mamawh tawh. 

Iran striker Ali Daei-a'n ram tan gaol 109 a khung a, kum 35 mi Ronaldo hian goal 101 a khung tawh. Portugal captain hian a football career tawp lam a hmang tawh a, record khum theihna hun ṭha nei mah se a khum ngei ang tih theih a la ni lo.

Ronaldo hian Euro 2004 aṭangin Portugal tan hming a chher a, group stage-a champion zui ta Greece nena an match hmasa berah goal a khung nghal. Hei hi ram tana a goal khung hmasa ber a ni a, Euro 2004-ah hian Netherlands lamah goal a khung bawk.

Portugal captain hian 2006 aṭang khan FIFA World Cup khel ṭanin khawvela football inelna lian berah hian tel ziahin inelna vawi li a khelh tawhah goal sarih a khung a, inelnaah hian goal a khung vek.

Europe-a footbal inelna lian ber European Championship-ah pawh 2004 aṭanga khel ṭanin inelna vawi li a hmachhawn tawh aṭangin goal kua a khung a, World Cup ang thoin inelna zawng zawngah goal a khung vek.

Player la khel lai zingah Ronaldo record tluk pha teuh deuh chu India captain Sunil Chhetri (72), Argentina captain Lionel Messi (71), Ali Mabkhout (63), Robert Lewandowski (61) leh Luis Suarez (60) te an ni a, an kum zat thlirin Portugal captain record hi an tluk phak a rinawm tawh loh.

September thla tira Ronaldo-a'n Sweden laka goal hnih a khung khan goal 101 a khung tling chiah a, hemi ṭum hian Juventus forward chuan, "Tunah chuan mellung pawimawh tak goal 100 ka khung tling ta a, hmabak chu record a ni," tiin a sawi a, Ali Daei record khum ngei a tum.

Ronaldo hian goal 101 khung tur hian match 167 a mamawh a, match tina goal 0.6 ang zela khung ang a ni. Statistics aṭanga a lan dan chuan Ronaldo hian record siam turin match 15 an la mamawh. 

Kum khata ram inelna awm zat chhut chuan Ronaldo hian record siam turin kum khat tal chu a la mamawh tihna a ni a, la nghah rih deuh a ṭul dawn. Chutihrualin kum 2019 chhung khan Ronaldo hi ram tan match 10 a inlan a, goal 14 a khung. Kuminah pawh match thum chauh a la inlan chungin goal hnih a khung a, tun hnaia goal khung theih dan thlirin beisei aia hmain record hi a thleng thei bawk.

Nations League-ah Portugal hian Sweden (zanin), France (Nov 14) leh Croatia (Nov 17) te an la hmachhawn dawn a, goal tam tak khungna tur inkhel niin a lang lo. Chutihrualin Ronaldo hian World Cup-a Spain nen an inkhelh ṭumin hattrick a siam tih a hriat a ṭha a, Portugal hian November 11 khian friendly match-ah team tenau Andorra an hmachhawn dawn.