Mavericks tan beiseina a la thi lo e!

Dallas Mavericks chuan NBA champion nih an tumna kawngah beisei an la nei, chak lo ni se la chuan inelna zo thei a ni tawh a, mahse an mikhual Boston Celtics chu 122-84 in an lo hneh.

NBA Finals hi best of seven series hmanga khelh a ni a, game 4 thleng an khelh tawhah Boston Celtics hian 3-1 in hma an hruai. June 18, Thawhlehni zing dar 6:00 hian game 5 an khelh leh ang.

Game 5 khelhna tur hi TD Garden a ni dawn - Boston hian anmahni khelmualah ngei NBA champion nih theihna remchang an nei dawn, an chak a nih chuan Los Angeles Lakers nena record inṭawm an neih (17 titles) chu an kalsan thei dawn a ni.

Inrinni zing game 4 inkhelah Mavericks tan Luka Doncic chuan a theihna rawn pho langin point 29 a nei a, ani bakah hian Kyrie Irving chuan point 21 a nei bawk a, an chak theih nan an thawhhlawk hle a ni.

Basketball inelna lian leh ngaihhlut berah hian, playoff chinah 3-0 a nih hnua chak let thei an la awm ngai lo. Maverics hian team dangin an la tih ngai loh tih theih an tum dawn, an hna erawh a hautak takzet dawn tih a chiang.

Slovenian tlangval Luka Doncic chuan, "Kan chak loh leh chuan inelna a zo nghal dawn tih kan hria a, chumi hre reng chung chuan game 4 kha kan khel, a rah chhuah ṭha tak pawh kan hmu.

"Mimal tinin beiseina kan nei a, kan rilru chauh ni loin taksa pawh kan tihchak zual a pawimawh dawn hle a ni. Chak tum chungin TD Garden-ah pawh kan inlan ang," a ti a, a tawp thlengin huaisen taka beih an tum.

Dallas tan hian bench aṭanga lut Tim Hardaway Jr chuan point 15 neiin kum 20 mi Dereck Lively II pawhin point 11 a nei bawk a, ni dang aiin Doncic leh Irving ten thlawptu an neih ṭhat chu an chhawr hle.

Boston Celtics lamin ni dang an phak lo - Jayson Tatum leh Jaylen Brown te meuh pawhin point 15 leh 10 bak an nei lo - NBA Finals an khelh ve tawh china an chak loh chian ber ṭum an tawng hial.

Boston coach Joe Mazzulla chuan, "Ka naute hi an chau ve tawh a, match zawng zawngah ṭha taka khelh vek chu a harsa a ni. Chawlh an nei zeuh ang a, chumi hnuah ṭha takin an lo kir leh mai ang," a ti a, anmahni khelmualah ngei champion an tum.