Terzic thlaktu Nuri Sahin

Borussia Dortmund chuan an manager thar atan Nuri Sahin an lakluh thu an puang - Sahin hian manager kal chhuak ta Edin Terzic hmun ruak a luah khat dawn a, a contract rei zawng erawh chiang taka tarlan a ni lo thung.

Edin Terzic kaihhruaina hnuaiah season hmasa khan Dortmund hian Champions League final an lut a, nomawi inchuhna inkhelah Real Madrid an ngam lo thung.

UCL final an khelh zawh aṭanga rei lote hnuah Terzic hi a chhuak, European inelna lamah che ṭha mah se Bundesliga lamah chuan pangana an ni a, season an hmang ṭha lo tia sawi theih a ni ve bawk.

Player a nih laiin Sahin hian Dortmund tan match 274 a khel - Jürgen Klopp kaihhruaina hnuaiah Bundesliga nomawi a chawipui a, Champions League final an khel bawk - tunah chuan team enkawltu ni chungin chona a hmachhawn ang.

Kum 35 mi Sahin chuan, "Ka tan chuan Borussia Dortmund enkawl chu chawimawina a ni, he dinhmun chelh tura ka chunga rinna nghattu club thuneitute zawng zawng chungah lawmthu ka sawi," a ti.

Dortmund sporting director Sebastian Kehl chuan an manager thar Sahin chungah rinna an nghat tih a sawi a, player a nih lai bakah season hmasa khan assistant manager ni chungin Terzic kha nasa takin a lo pui tawh tih a sawi bawk.