Manager naupang ber Fabian Hurzeler

Premier League club Brighton & Hove Albion chuan manager thar atan Fabian Hurzeler an la lut - kum 31 mi chauh a la nih avangin EPL manager nghet awm tawh zinga a naupang ber a ni nghal bawk.

Season hmasa khan Hurzeler hian St Pauli chu Bundesliga 2 title a lakpui - German rama football inelna sang pahnihnaah hian match 34 an khelh zinga 20 zetah hnehna a chanpui thei a ni.

Brighton manager hmasa Roberto de Zerbi kha season tawp rualin a chhuak a, tunah chuan Hurzeler hian a hmun ruak a luah dawn a, kum 2027 thleng cham turin contract hi a ziak.

Brighton chairman Tony Bloom chuan, "Brighton & Hove Albion hian khelh dan phung kan nei a, chu kan inkhelh duh dan chu Fabian Hurzeler-a thiam chi tak niin kan hria a, chuvangin kan club nen ṭha taka kan thawhho theih ka beisei.

"Khelh dan phung bakah player lei leh hralh, hmathlir thlengin chin dan ṭhan kan nei a, chu thil chu ani kaihhruaina hnuaiah hian kan tihhlawhtlin theih kan ring," tiin an manager thar lakah beiseina an nei sang hle.

First team coach Andrew Crofts leh goalkeeping coach Jack Stern te chuan an hna ngai an chelh dawn a, hei bakah hian Brighton chuan Hurzeler-a leh a coaching staff te chu an lawmlut tih an sawi bawk.