Wimbledon khel lo tur Nadal

Rafael Nadal chuan Wimbledon 2024 a khel dawn lo tih a sawi chiang a, vawi hnih a champion tawhna hmunah inlan thei dawn lo mah se Paris Olympic erawh khelh ngei tumin a inbuatsaih thung.

Kum 38 mi Nadal hian a hun hnuhnung a hmang mek a, inelna zawng zawng a hmachhawn thei tawh lo. Tun hnai khan French Open pawh khel ve mah se a match hmasa berah Alexander Zverev a hneh lo.

Spanish star hian an ram tan Olympic khelh a duh a, mipa doubles huangah French Open champion hlim Carlos Alcaraz nen an inkawp ang - inelna hi Paris khawpuia neih tur a ni ang.

Grand Slam vawi 22 champion tawh Nadal chuan, "Wimbledon hi a khelh a nuamin boruak pawh a zangkhai thei hle a, kumina ka inlan thei lo tur pawh hi a pawi ka ti takzet.

"Ka taksa dinhmun ka ngaihtuah tel a ngai a, chuvangin inkhelhna leilung thlak kual loin grass aiin clay lama hun ka hman a ṭul rih zawk," a ti. Olympic hi Roland Garros-ah an khel dawn - Nadal tan chuan a inkhelh thiamna hmun a ni.

A vanglai pawhin Nadal hi grass court-ah chuan a ṭha tawk lo tih a ni ṭhin, chutihrualin grass court inelna lian ber Wimbledon title hi 2008 leh 2010 khan a la tho a, a ṭhat lohna pawh hi midang tan chuan hahipa sawi tham a ni tho.