Hliam vangin City-ah KDB a kir

Manchester City midfielder Kevin de Bruyne chu zanin dar 12:15 a Iceland nena Nations League match khel tur Belgium squad aṭangin a inhnukdawk a, Manchester City lamah a kir. 

Belgium hian Pathian-ni zan khan Nations League-ah England an hmachhawn a, minute 73-naah KDB hi lakchhuah a ni. Belgium manager Roberto Martinez chuan, "A inhliam vang ni loin kan ven-thawn vanga lachhuak kan ni zawk a, 100% a ni lo a ni," tiin a midfielder chungchang hi a lo sawi tawh. 

Belgian national team chuan, "De Bruyne chu a club khelhnaah kirtir a ni a, Iceland hmachhawn turin a inpeih hman lo a ni," tiin thuchhuah an siam a, City tan thu hriat nuam a ni lo ang. 

Manchester City forward Raheem Sterling chuan hliam vang thoin England squad a zawm thei lo tawh a, Inrinni zan dar 10:00 a Arsenal mikhual tur City-in player pahnih an chhawr theih dawn leh dawn lohah thuchiang a la awm lo.