Mumbai City coach thar Lobera

Indian Super League (ISL) club Mumbai City FC chuan coach thar atan Sergio Lobera an lakluh thu an puang a, Spanish coach hi hlawhtling taka FC Goa loa kaihruai tawhtu a nih avangin Indian football-ah a mikhual lo. 

Lobera hian February khan FC Goa hi ISL table chung bera a awmpui laiin rin loh takin a chhuahsan a, March khan Mumbai club a zawm ngei hi rinawm tawh mah se Thawhṭanni khan coach atana lakluh a nih thu hi an puang ve chauh a ni. 

Kum 43 mi Lobera hi FC Goa lama a thawhpui assistant Jesus Tato leh fitness and conditioning coach Manuel Sayabera-te chuan an zui a, Moroccan club Moghreb Tetouan a enkawl laia a thawhpui Juan Maria Cruz Arias chu goalkeeping coach atan lakluh a ni bawk. 

Season hmasa lama FC Goa tana khel Hugo Boumous, Ahmed Jahouh, Mourtada Fall leh Mandar Rao Dessai-te chuan an pu hlui hi Mumbai lamah an zui a, English striker Adam le Fondre (Sydney FC) leh Nigerian striker Bartholomew Ogbeche (Kerala Blasters) an lakluh tawh bawk avangin a tawh an khirh ang.