England chakpuitu Jude Bellingham

A hming kan lam fo a, kan lam chhunzawm zel dawn chiang a ni - Jude Bellingham hi England tan 'Super Star' a ni chho mek, khelmual a chhuahsan dawna inkhel entuten zahna chibai an buk dante kha ropui tak a ni.

England chuan Pathianni zanlai khan Euro 2024 an match hmasa ber an khel ṭan ve ta a, an khingpui Serbia chu midfielder ṭhangduang Bellingham-a goal khat hmangin 1-0 in an hneh.

Gareth Southgate-a nauten duhthusam veka ṭhain khel lo mah se point thum nen bul an ṭan thei. June 20, Ningani zan dar 9:30 hian group match pahnihna atan Denmark an hmachhawn chhunzawm leh nghal ang.

Player inlan

England captain Harry Kane dinhmun a chiang a, tuin nge thlawp ang tih chu zawhna lian tak a ni ṭhin. Manchester City forward Phil Foden leh Arsenal fachuam Bukayo Saka te chuan a sir aṭangin an thlawp.

Real Madrid duhlai Bellingham chu number 10 a ni a, a hnungah Declan Rice awmin Gunners midfielder hi Trent Alexander-Arnold nen an ding dun a, season hmang ṭha Cole Palmer leh Kobbie Mainoo te chu bench lamah an awm.

John Stones kiangah Crystal Palce defender Marc Guehi awmin a sirah Kyle Walker leh Kieran Trippier an awm a - Luke Shaw a inlan rih lo. Everton goalkeeper Jordan Pickford chuan si ban a nghak thung a ni.

Serbia lamin an striker ṭha Aleksandar Mitrovic leh Dusan Vlahovic te an inkawptir a, khawvel huap pawha striker hriam leh hmuhnawm zinga mi an nih avangin Three Lions tlarhnung tan pawh hna a awlsam lo.

Hei le Bellingham

FC Schalke khelmual Veltins Arena-a ram pahnih inkhel tur hi hamrik hmasa a rik aṭangin a boruak a nung daih tawh, stadium pawn lamah fan-ten buaina an lo siam hman - ṭhutthleng leh dawhkan te tihchhiat niin tuium (bottle) in an invawm bawk.

Tualchhung police ten buaina an ti mit thei a, pawn lam boruak ang bawkin khelmual chhung boruak pawh a nung ṭha. Minute 13-naah Walker chuan Saka tana um turin ball a pe - Arsenal forward ball cross hi lo dang pial deuh mah se hlauhawm takin a chho tho.

Box chhungah Serbian player paruk ngawt awm mah se, hmun hlauhawm zual lai taka ding Bellingham vengtu an awm lo! Real Madrid midfielder hian chiang lutukin a tauh lut a, a tir lama goal khat lut hi England tana point thum hmuh nan a tawk zui nghal.

Birmingham kianga awm Stourbridge-a piang Bellingham hi minute 96-naah Manchester United rawlthar Mainoo chuan a rawn thlak a, khelmual a chhuahsan dawn hian entu mipuiten zahna chibai an lo buk - hei hian khelmual chhunga a ṭangkaizia a pholang.

England thlirna

Goalkeeper Jordan Pickford-a'n striker ṭha Dusan Vlahovic goal khung tur a dansak chu an chak theih nana thil pawimawh a ni a, captain Kane-a'n an goal hnihna khung theihna remchang nei mah se goal bar a tauh per thung.

Euro ṭan hmain Saka nge Palmer lut ang tih inhnialna a tam, match hmasa ber a zawh chuan Saka chu Southgate-a'n a ringtawk tih a lang, a rin ang ngeiin a chhanna a pe - Arnold nen an inkawprem em avangin an pahnih chungah rinna a nghah chhunzawm a rinawm.

Foden erawhin beisei a phak rih lo - Pep Guardiola-a'n mual laia lut turin zalenna zau a pek ang kha a nei chiah si lo - Bellingham a awm si. Folden leh a hnunga awm Trippier ten an khelh thiam dan berin an khel lo tih a lang a, manager tan enfiah zeuh a ngai dawn.

Rawlthar Mainoo leh Adam Wharton te aia Arnold a thlan chhan pawh kan hmu, Liverpool defender hian hla tak takah ball a pass thiam a, tawnhriat a nei ṭhain setpiece atan a hlauhawm bawk, hmun hlauhawm laia ball hloh lo tura a fimkhur erawh a ngai dawn - Mitrovic khan a hrem teuh hle.