Eriksen-a'n goal a khung

Hun tam a la liam lo - khelmual chhungah Christian Eriksen chu lungphuchawl vangin a tlu a, a ṭhiante chuan an din hliah ṭhap a nih kha, a inkhel leh thei ang em, tih ai chuan a dam chhuak leh ang em, tih zawhna a lian zawk.

Ni 1,100 a ral meuh chuan a inkhel leh a ni satliah lo a, tunah chuan Eriksen hian Denmark tan Euro 2024 a khel a, goal hmahruai a khung; an khingpui Slovenia nen 1-1 in an inhnehtawk zui ta a ni.

Pathianni zan inkhelah Eriksen hian Jonas Wind-a ball khen per chu a awma la thlain leiah vawi khat a sawhtir a, chumi hnuah chiang zetin goal kilah a pet lut - goal mawi zinga chhiar a ni ang.

Manchester United striker Rasmus Hojlund-a'n khung belh theihna remchang nei mah se goalkeeper Jan Oblak a paltlang thei lo. Slovenia hmatawng Benjamin Sesko chuan hla deuh tak aṭangin goal ban a pet per dawp ve bawk.

Slovenia an tlawm duh bik lo, na takin an nawr chhunzawm - hun tawp hma minute 13 vel la awmah Erik Janza chuan box pawn aṭangin a hlap lut, ball kal hi an lo tawh pial zeuh avangin goalkeeper Kasper Schmeichel tan dan theih a ni lo.

Ram pahnihin point an insem a, group C aṭanga last 16 lut turin beisei an nei chhunzawm ang. Denmark hian England an tum zui dawn; Slovenia leh Serbia ten an match pahnihna an khel ve leh thung ang.

Inkhelh banah Eriksen chanchinin sawi zui a hlawh. Man United midfielder Eriksen chuan, "Euro hmasa nen chuan ka chanchin a danglam ta hle. He inelnaah hian goal ka la khung ngai lo, tunah chuan ram tan hna ṭha tak ka thawk niah ka ngai," a ti.