Ronaldo awmna Portugal inlan hun

Cristiano Ronaldo hoin Portugal chuan zanin dar 12:30 hian Euro 2024 an match hmasa ber an khel dawn; Veltinis Arena-ah Czech Republic an hmachhawn dawn a ni.

Group F inkhel dangah Turkey leh Georgia te an inhmachhawn ve dawn bawk a, anni pahnih hi zanin dar 9:30-ah an inkhel thung dawn a, inkhel hi Sony Sports lamah live hmanga en theih a ni ang.

Player ropui bik Ronaldo hian ram tan Euro nomawi a chawi tawh, an champion ṭum hian hliam vangin final a khel mumal lo, ama ho ngeia champion a chak ang tih chu thil chiangsa a ni.

Euro inbuatsaihna an match hnuhnung berah Portugal hian Ireland 3-0 in an sawp a, he inkhelah hian Ronaldo chuan goal thum a khung. A khelhpui player ṭha tak takte chuan Euro 2024 nomawi chawi an phu tih a sawi bawk.

Ram tana goal khung tam ber, match 207 aṭanga goal 130 khungtu Ronaldo chuan, "Zawimuangin, fimkhur taka kan kal chhoh a ngai dawn. Tournament khelh chhung hi a rei lo a, a liam leh mai dawn a ni - chumi hmachhawn thiam chu a ngai.

"Ka khelhpuite hi player ṭha tak tak an ni a, anni ho hian semifinal chauh ni loin a aia sang zawk thlen pawh an phu. Mimal tak pawhin ka inbuatsaihna a ṭha a, tournament khel tur hian ka inpeih tawh a ni," a ti.

Ronaldo hi kum 39 mi a ni tawh a, nakkum February 5-ah kum 40 a tling dawn. European Championship hi vawi ruk a khelhna tur niin inlan tam ber a ni a, a tan kumin hi hun hnuhnung a ni tawh bawk ang, nomawi chawi a châkna a zual a nih pawhin a demawm loh.

Euro 2016 champion an nih ṭuma khel zingah Ronaldo bakah hian defender Pepe leh goalkeeper Rui Patricio te an la awm a, midang chu a thar vek an ni - coach Roberto Martinez pawh mi thar a ni bawk.

Portugal hian Manchester United captain Bruno Fernandes, Paris Saint-Germain midfielder Vitinha, Manchester City duhlai Bernardo Silva leh Ruben Dias te an nei a, player an nei ṭha rual hle.

Premier League chauh a ni lo - La Liga leh Serie A lama langsar Joao Felix leh Rafael Leao te an nei bawk, player malkhai chuan a nei ṭha berte zinga mi an ni phak tih a chiang a, coach Martinez hian eng anga thui nge a thlenpui theih tih kan hre dawn a ni.

Portugal coach Martinez chuan, "Team khelh dan phung aiin player ten anmahni thiamna an hman chhuah theih dan tur hi ka dah pawimawh zawk. Kan khelh dan tur hi chu player a zirin a tihdanglam theih mai zawk," tiin a sawi.