Netherlands chakna Weghorst

Euro 2024-ah Netherlands-in an match hmasa berah Poland 2-1 in an hneh a, chakna goal hi substitute Wout Weghorst khung a ni. Ronald Koeman-a hote hian June 21, Zirtawpni zan dar 12:30-ah champion tura rinkai France an hmachhawn dawn. Les Bleus hian nizan khan Austria an hmachhawn a, result kan hre hman lo.

Volksparkstadion, Hamburg-ah Oranje leh Poland te an inkhel a, inhliam vangin Poland-in Robert Lewandowski an chhawr thei lo. Lewy awm lo mah se Poland-in goal an khung hmasa. Minute 16-naah corner kick hmang ṭangkaiin Adam Buksa-a'n ṭha zetin a tauh lut.

Poland-in goal an khung hma hian Netherlands-in Cody Gakpo leh Xavi Simons te hmangin goal chance an insiam tawh. Si an phurh hnuah Oranje goal nawr a na lehzual a, minute 29-naah Liverpool forward Gakpo-a'n box pawn aṭanga petin Poland defender-te a per avangin keeper Wojciech Szczęsny tan dan ngaihna awm lo.

First half-ah goal dang a luh belh lo a, second half ṭan hnuah pawh Netherlands thoin inkhel an thunun. Gakpo-a'n goal khung belhna chance ṭha dang nei mah se a khung belh thei lo a, kum 21 mi Simons pawhin chance ṭha bik a hlah.

Poland an bet reng bik lo a, Tijjani Reijnders-a'n Dutch keeper Bart Verbruggen tan hna siam mah se goal hmuh tur a awm lo. Minute 81-naah Memphis Depay la chhuakin Wout Weghorst a rawn lut a, Man United striker hlui hian a luh aṭanga minute hnihnaah chakna goal a khung.

Weghorst hian a ball khawih hmasa berah Nathan Ake ball pek chu ṭha zetin goal-ah a pet a, a hnaih tawh em avangin keeper Szczesny-a'n a dang hman lo. Netherlands-in 2-1 in hma an hruai a, Poland-in risk lain an nawr ta thung.

Substitute Karol Świderski-a'n hun tawp hma hretin ṭha zetin goal-ah pet mah se keeper Verbruggen-a'n a dang. Netherlands an ṭang tluan a, 2-1 a hnehna changin point thum hlu tak an hlawh chhuak.

Chakna goal khungtu Weghorst chuan, "First half-ah inkhel kan thunun a, team ṭha zawk kan ni. Goal chance vawi sarih vel kan insiam thei a, kan hmang ṭangkai tawk lo. Kan chance neih hmang ṭangkai ila, hna a awlsam hret ang," tiin a sawi.

Man of the match-a thlan Gakpo chuan, "Inkhel harsa tak a ni a, goal hmaah hriam tawk lo mah ila, a pumpuia thlir chuan kan khel ṭha thawkhat. A tawp thlengin theihtawp kan chhuah a, substitutes kan nei ṭha bawk. Kan inkhel kha, stadium-ah ka chhungten min thlir a, hnehna kan chan bawk avangin ka lawm hle," tiin a sawi.

Netherlands hian World Cup nomawi an la chawi lo a, Euro C'ship-ah erawh kum 1988 khan an champion. Tun hnaiah erawh result an nei ṭha tawk lo a, Euro 2016 khel turin an tling zo lo a, inelna hnuhnung berah last 16 bak an thleng lo.

Tute nge inlan?

Poland: Szczęsny; Bednarek, Salamon (Bereszyński 86), Kiwior; Frankowski, Zieliński (Piotrowski 78), Romanczuk (Slisz 55), Zalewski; Urbański (Świderski 55), Buksa, S. Szymański (Moder 46)

Netherlands: Verbruggen; Dumfries, De Vrij, Van Dijk, Aké (Van de Ven 87); Schouten, Reijnders, Veerman (Wijnaldum 62); Simons (Malen 62), Depay (Weghorst 81), Gakpo (Frimpong 81)