T20 Cricket World Cup : Bangladesh-in Super 8 an lut
T20 Cricket World Cup-ah Super 8 lut tur a hriat kim a, team ṭha New Zealand leh Pakistan tan hmun a awm lo. Nimin zing khan Bangladesh-in Nepal 21 runs-in an hneh a, point ruk hmuin group D aṭangin South Africa nen Super 8 an lut.
Super 8-ah hian team pariat chu group hnihah team pali ve vea ṭhen an ni a, group A-ah India, Australia, Afghanistan leh Bangladesh te awmin group B-ah West Indies, South Africa, England leh United States te an awm thung.
Inkhel a nung
St Vincet-ah Bangladesh leh Nepal an inhmachhawn a, Nepal-in vawm hmasak an thlang. Bangladesh opener Tanzid Hasan-a'n run siam a lo a, captain Najmul Hossain Santo pawhin run 14 chauh a siam.
Nepal bowler Sompal Kami (10/2), Dipendra Singh Airee (22/2), Rohit Paudel (20/2) leh Sandeep Lamichhane (17/2) ten wicket hnih ṭheuh an la a, over 19.3-ah Bangladesh batter-te thi fai vekin 106 runs chauh an siam.
Nepal-in chak beiseina an nei a, mahse top order-te an che ṭha bik lo. Middle order-a awm Kushal Malla (27) leh Dipendra Singh Airee (25) te zarah chak beiseina an nei hman. Mahse, Bangladesh bolwer-te an che ṭha a, tailender pali Gulsan Jha, Sompal Kami, Abinash Sohara leh Sandeep Lamichhana ten run an siam lo. Over 19.2-ah Nepal batter-te an thi vek a, 85 runs chauh an siam.
A pawimawh tawh lo
Super 8 khel tur chiang tawh mah se group match khelh zawh a la ni lo. Pakistan chuan group match hnuhnung berah Ireland chu wicket thumin an hneh. Shaheen Afridi-a'n wicket thum (22/3) lain thi loin 13 runs a siam a, player of the match-a thlan a ni.
Shaheens hian hnehna chang mah se an group-a an elpui India leh United States te an hneh loh avangin group stage an paltlang zo lo. Inkhel dangah nimin khan Sri Lanka-in Netherlands chu 83 runs-in an hneh.
Lions hian bat hmasain 201/6 runs an siam a, an target an san em avangin Netherlands tan chhanlet ngaihna a awm lo. Over 16.4-ah Netherlands hian 118 runs siamin an thi vek.
Tukin zing dar 6:00-ah Super 8 lut tawh pahnih West Indies leh Afghanistan ten group match hnuhnung ber an khel. Super 8 hi June 19, Nilaini aṭangin khelh ṭan a ni ang.