Sainunmawia'n bronze medal a hlawh chhuak

Mizoram badminton-in chanchin lawmawm hriat tur a nei leh ta - Yonex-Sunrise All India Sub-Junior Ranking Badminton Tournament 2024-ah Sainunmawia Sailo chuan bronze medal a hlawh chhuak a, Ramhlun Venglai rawlthar hian Under-17 Mixed Doubles category-ah bronze hi a vaw chhuak.

JSK-Chetan Anand Sports Centre, Ameenpur, Miyapur, Hyderabad-a neih inelnaah Siphir Badminton Club player Sainunmawia hi Ishita Negi nen ṭang dunin, qualifying round aṭangin bul an ṭan - qualifier match ringawt pawh vawi thum an khel a, mahse, semifinal-ah uiawm takin Manish S. Reddy leh Deepak Raj Aditi-te ṭangdun chu deciding game-ah 21-19, 19-21, 15-21 in an hneh zo ta lo a ni.

Sainunmawia Sailo hi Vanlalpekhlua Sailo nen ṭang dunin, U17 Boy's Doubles-ah an inlan bawk a, quarterfinal an thleng. Mahse, seeded no. 3 Bala Pranay Pragda leh Pranit Somani te ṭang dun chu 21-18, 21-11 in an hneh zo ta lo.

June 10-17 inkara neih inelnaah hian U17 Boy's Doubles category-ah Malsawmhlua (Mama), Serchhip chu a partner nghet Mahendra Kalahasti nen inkawpin an inlan a, semifinal an lut. Mahse, semifinal khelh hma hian a kawppui Mahendra lakah complaint thehluh niin, Adhaar card chungchang buaina avangin chak lo zawkah puan an ni - a uiawm hle.

Hetiang chiah hian Champhai naupang Zoramthari Renthlei chu a ṭanpui nen U15 Girl's doubles-ah champion lai an vuak tlak hnuin, a partner chu kum chungchangah hek a ni a, adhaar card buaina avang bawkin quarterfinal match khelh turah walk over-in chak lo zawkah puan an ni.

Zoramthari hi U15 Girl's Singles-ah inlanin, round of 32 a invaw thleng a, Vanlalhruaia Sailo chuan U15 Boy's Doubles-ah round of 16 thlengin, U17 Boy's Doubles-ah qualifying aṭanga ṭanin, round of 32 a thleng thei bawk.

Mizo naupangte hi TATA Trusts, NEIDA, MSSC leh Mizoram Badminton Association (MBA) te thawhhona aṭanga chherchhuah, Kotak Pullela Gopichand Badminton Academy (KPGBA), Hyderabad leh ITM University Badminton Academy, Raipur-a TATA Trusts (NEIDA) sponsor-a awm mekte an ni a, MBA chuan Mizo naupangte chu an chhuan thu sawiin, dinhmun sang zawk leh hlawhtlinna ropui zawk an chan zel theih nana theihtawp chhuah zel turin duhsakna an hlan thu an sawi bawk.