Min chelh duhin Ibiza-ah an rawn thlawk - Ten Hag

Manchester United manager Erik Ten hag chuan chawlh a hmanna Ibiza-ah club hotuten rawn thlawkin, cham tura an ngen thu a sawi. Dutch manager Ten Hag hian FA Cup-a Man United a champion hnuah pawh a dinhmun a chiang lo a, tun season-a a chet dan an zirchian hnuah chauh, a cham tur thu an tichiang.

Ten Hag chuan, "Ibiza-a chawlh ka hman meknaah club hotute an rawn kal a, min hrilh lawk loin ka thlenna hmunah an rawn lang hlawl a, hna chhunzawm tura min duh thu, an lo sawi," tiin Old Trafford-a a la cham tur thu a sawi.

Season liam taah khan man united hi pariatnaah an awm a, Premier League ṭan hnua an chet chhiat ber ṭum a ni. Chutihrualin FA Cup-a an champion avangin season tharah Europa League an khel dawn.

Club neitu thar Sir Jim Ratcliffe-a'n Ten Hag dinhmun chian hmain Bayern Munich manager hlui Thomas Tuchel a kawm a, German manager hi Man United manager tura sawi a awm hman. Mahse, Ten Hag chuan, "Manchester United chuan Tuchel nen an inbiak thu min hrilh a, mahse inbiakna an neih hma hian manager ṭha ber an neih avangin thutlukna an siam fel tawh. Ineos an fimkhur a, football-ah mi thar an nih avangin thil mak a ni lo. Thil awmdan an thlir a, manager ni thei tura an ngaih ṭhahnem tak an bia a ni," tiin amah chu club enkawl tura ṭha bera an la ngaih thu a sawi.

Ten Hag hian Man United hi season hnih chhungin League Cup leh FA Cup final-ah a champion pui a, a record a chhe lo. Dutch manager hian Old Trafford-a cham turin thutlukna siam tawh mah se contract thar ziak tur chuan club hotute nena an inbiak chhunzawm tur a thu a sawi.